ZALEN February 23, 2026: Mizo Hnam Run chhung inkhawm chu vawiin khan neih a ni a. Hun hnihna political session-ah Pu MNF Legal Board Vice Chairman leh Gen.Secy MNF GHQ. ni bawk Lalpianfela Chawngthu chuan thusawiin, "Lengpui ram Indian Air Force (IAF) hnena hralh chungchangah Chief Minister leh ZPM sawrkar chuan thudiklo tam tak sawiin dan an pawisalo hle. ZPM sawrkar chuan ram danpui leh Mizoram Legislative Assembly-in a adopt, Right to Fair Compensation and Transparency in Land Acquisition, Rehabilitation and Resettlement Act, 2013 (RFCTLARR Act, 2013) chu nasa takin a bawhchhia a. He ram lakna kalpui danah hian eirukna lian tham a awm ngei a ni tih chiang takin a lang a. MNF chuan he thil thleng hi pawi kan ti hle a ni," a ti.

MNF Legal Board Vice Chairman Lalpianfela Chawngthu chuan a hnuai zawhna hi ZPM Sawrkar a zawt tel.

(1) Lengpui ram hi RFCTLARR Act, 2013 hmanga hralh a nih si chuan MNF hunlai khan he dan Mizoram Assembly-in a adopt-na resolution mipuiah an pho chhuak thei em?

(2) RFCTLARR Act, 2013 hnuaiah MNF khan Lengpui ram Land Acquisition atan Preliminary Notification an tihchhuahna copy min pe thei em?

(3) RFCTLARR Act, 2013 hnuaiah Lengpui ram atan SIA Study tihna document min pe thei em?

(4) Engvangin nge compensation award a tlem zawkna tur MLARR Act, 2016 High Court-in a paih khan Supreme Court-ah ZPM hi an zualko zui loh?

(5) ZPM Sawrkar hian eng vangin nge Lengpui ram hralhna hi mi pahnih te lak turin a then hran?

(6) Pu Lalduhoma khan UNNATI Scheme hnuaiah loan la ang khan a insawi niin kan lo hre bawk a. Cheng Vbc 15 loan hi eng bank berin nge pe? A loan document hi mipuiah a pho chhuak ngam em? Thla khata he loan rulhna tur hi a lo berah cheng nuai 10 vel zat zat a ngai dawn tihna a nih hmel a. Khawi pawisain nge a rulh dawn?

(7) General Operational Guidelines for Submission and Processing of Claims under UNNATI Scheme, 2024 a lang lem lo Tourism Dept. hian engvangin nge kan CM hi consent an lo pek ve ringawt na chhan?

(8) Fake Account hmanga mi bei thina a puh David Sailo leh Tv U Hranga te pawh man chhuak chat chat thei CM hian engvangin nge vawiin thlengin nasa taka Eiru-a puhtu Pu Zodintluanga leh Pu John Rotluangliana te, chhui chhuah chawp pawh ngai lo te hi a la man ve ngam loh?

(9) Sihhmui chungchang leh Dawrpui JAC chungchanga puhnaah CM hian party rawn lova Criminal Complaint a thehluh mai laiin eng vangin nge Lengpui ram hralnaah hian Party thu thu a tih bik?

(10) CBI ten dik leh langtlang taka Lengpui ram hralh chungchang an chhui theihnan CM leh Revenue Minster-te hi an bang ngam dawn em? Tihte hi kan zawt a ni, a ti. ZPM sawrkar hian an duh chinah dan an bih a. An sawichhuah leh duhdan a dik thin si lova. Thu belhchian dawl lovin mipui rilru hruaikawi an tum fo a ni, a ti bawk.