October 30, 2023; Vawiin, ni 30.10.2023 tlai dar 4 a Tuikual South MNF Unit-I Election Campaign Office chu bialtu MLA Lalruatkima'n a hawng.

Media and Publicity Cell, Aizawl West-II MNF Block thuchhuah a tarlan a nih danin, he hun a thusawitu Congress Local Council Member, tuna Local Council Chairman ni ta Douglas Lalmawikima chuan, "Tuikual South Local Council Chairman in ZPM a zawm avanga harsatna kan tawh chungchangah Local Council namthluk ngai lova khawtlang zahawmna humhim tura MNF Local Council Member-te nena Local Council thar kan siam thei hi ka lawm a ni," tiin "Khawtlang tana thiltha ti turin Congress leh MNF Local Council member te hian theihtawp kan chhuah dawn a ni," a ti bawk.

Tuikual South MNF Unit-I Election Campaign Office hi bialtu MLA leh MNF Official Candidate Lalruatkima chuan hawngin, "Tuikual South khawtlang tana hmasawnna hna kan thawh hrang hrang te hi khawltang inlungrualna vang a ni a. Rokunga Volleyball Court siamna tur work order a awm tawh a, Tuikual South Thlanmual hmunhma atana sumtuakna tur work order pawh tihfel a ni tawh bawk. Char number kawngpui siamthatna tur pawh tihfel tawh niin school te kan thuamtha a, Dinthar to Tennis Court road kan han zauh te hi Tuikual South mipuite vang a ni," tiin "Tuikual South High School, khawtlang ina in enkawl chu Provincialised a han ni ta a. Mipui phur pawh a zang huai ngei ang," a ti bawk.

Lalruatkima chuan, "Tuikual South-ah khawtlang mipui hmakhua tur pawh ngaihtuah lek lova ZPM in LC Chairman an han sawm chhuak hi a pawi ka ti a. Chutihlaia Congress unaute nena mipui rawngbawltu tur Local Council thar kan siam thei hi ka lawm a ni," a ti bawk.