ZALEN August 28, 2026 : Mizo Hnam Run chhung inkhawm vawiina thusawitu MNF Gen. Hqrs. Adviser RM Chakma, MLA chuan Assembly Session neih zawh tak a thlir letna neiin, 'he session-ah hian thil tam tak kan sawi a, kan session neih hi MNF party leh opposition-te hlawhtlinna a ni,' a ti.

"Tun session- kan neih zawh tak a thil pawimawh tak pakhat chu smart meter chungchang hi a ni a. Mipui tam tak tana he Smart Meter hman hi harsatna a nih thu kan sawi chamchi a, mahse kan Sorkar mek ZPM party ten bengkhawn duh loin, Sorkar hian smart meter hi hman chhunzawm a tum a. Mahse, MNF party chuan mipui tana tha lo chu kan do zel dawn a ni," RM Chakma chuan a ti.

RM Chakma chuan, "Kan CM hian Session chhungah meuh dawt tam tak a sawi a, Pathian pawh a zah lo hle a ni. Thil hre chiang loin a duh duh a sawi pawp pawp mai a, dawt hmangin zoram hi a kaihruai ni ber hian ka hria a ni. Zoram mipuite hian hetiang dawt sawi ching leh sawi anga awmlo te hi chu hnawl ngam turin ka sawm bawk che u a ni," a ti.

Chief Minister Lalduhoma thusawi chungchang sawiin, "ADC-ah Anti-defection law dan kan siam dawn' a ti a, hei hi 'Mizoram Legislative Assembly thuneihna a ni lo, State Legislative Assembly-in a duh dan ang anga ADC thuneihna hi a siam danglam theih a ni lo," a ti.

Robert Romawia, MLA chuan, Session neih zawh tak thlir letna neiin, sessionah zawhna lut pawh a tam loh tehlul nen, Speaker-in zawhna chhan ngei ngei ngai a admit zinga zawhna 22 chhan loh a a awm chu pawi a tih thu a sawi a, chhan ngei a phut a. MLA-ten zawhna chhanna an dawnglo chu mak a ti a, Privilege Motion move thleng pawhin hma lak chhoh al a ngai mai thei niin a sawi bawk.