Kan ramin MLA General Election 2018-a neihah mi tam tak beisei aia tam MNF chuan seat a la a; he hnehna hi MNF vote kher lote pawhin an lawmpuiin a hriat theih. A chhan chu kum 10 vel min hruaitu party an chhangkham niin a lang. Tin, Mizoram, Kristian state angah hi chuan regional party-in sorkarna an chang hi a him damin thlamuanthlakna lai a nei bawk. National party-te chuan Mizote mitmen tihfiah loh dan, khawthlir thui lova min siam dan, kan hnam damna aia development lamhawia bumna an thiam dan hi thuk tak a lo ni. Thlemna hmanrua an siam thiam dan hi.   Tun inthlanpui (2018) kan neih hian India central laipui rilru leh tum chiang takin a hailang a. Mizoram Chief Electoral Officer rilru leh chetzia chuan hnam pum min tibuai a, NGO Co-ordination Committee hmalaknain, ‘HNAM HNATLANG NEIH’ a chawk chhuak a. Kolasib District-a, DEO thiltih fel lo avangin Kolasib district-a mipuite harsatna a siamsak a. Lunglei District-a DEO pawhin Kolasib DEO ang bawkin, dik lo taka Tuikuk te votter tam tak siamsak a tum leh a, Lunglei mipuite buaina a siamsaknate khan Mizote chunga an rilru putzia chu Buichhia laih loh angin an inpuang a tih theih a ni.   Kei chuanin central lam mi pawimawhte an lo kala an thusawi thinah, - central-in North East leh Mizoram a ngaih pawimawh thu an sawi thin kha, ka rilru chhe tê pawh a tilawm ve ngai lo. A chhan chu, an hnuaiah kum sawmsarih (70) kan awm hnu a, ngaih pawimawh hlawh dawn chauh ang hian rilru an tinain fa tak anga min lo en lohzia a tilangin ka lo hre ve a ni.   Awle, heti lam chu tawk rih sela. Tunah hian Mizoram chhung mai ni lo, state pawn lam leh foreign a kan Mizopui awmte pawhin, MNF sorkar tharah beiseina sang tak an nei a, ram an enkawlin an hruai dawn a. Mipuite hnena ngaihdam an dilna tihhlawhtlingtu sorkar hi a mar dek reng chungin an hnathawh leh an hmalakna kan thlir reng dawn tih hriain, an tawng umphain, Pathian tih chungin hna thawk se, tih hi?Pathian leh mipuite beiseina a ni tih hria se a duhawm hle ang. Mizote tana pawimawh ber chu Hnam damna a niin, development hi chu a pahnihna a ni tih a hriat thar leh tul. A party Manifesto ah khan ramri humhalh ngamna leh Tuikuk leh Chakma hnawksak tihna a ziak lang tha ngam lo emaw tih tur ang chi leh, kan sorkar hrawn lai kal liam ta, ram tana thisen chhuaka tuar ten an ko eih thei lo ang kha ni lo turin kan beisei a ni. Huaisenna thar nei leh se kan duh a. A sorkar hmasakna a lo tihsual palh taka ngaihdam a dilnate zawng zawng pakhat mah mangnghilh lo turin mipuiin an beisei tih hria se, Chinghnia leh Uipain an ke hma lam hnim renga an muhil angin ram tana rawng an bawl a tul hmel hle a ni.   Tin, hei hi hre reng se a tha hle ang. Mizoramin sorkar kal tate kan lo hrawn tawhah, mipuite chanvo tur a chingpen (corruption) nasatzia sawi a ni fo. Hei hi ministry lam aiin offcial lamah a nasa fe zawk tih hi mi thil chikmite sawi dan a ni. Corruption chungchangah official lam veng zo ministry nih tum thei se. Corruption inchhui kual vel hi Kristian state nen a inhmeh lo va, Pathian leh kan ram tan a inhmeh hek lo. Thianghlimna zir chhuak se, ramin malsawmna a dawng ngei ang.   A hriat sa mah nise, kan sawi nawn atan a tha a ka hriat chu: “An tawng umpha rawh se,” tih hi. Hun hmasaah umphak loh an lo nei tawh tihna pawh ni em em lovin, ‘mahni tawng hriat zui hi thil pawimawh’ a ni a. CM tawng te, minister tawngte hi sorkar tawng a lo ni tawh a, mahni lei ven zawh hi Bible zirtirna pawh a ni. Kan CM thar turin sorkar a siam thei tih hriat hma chanchinbu miten a thiltih hmasak turte an zawha a chhannate leh ni 14.12.2018 Hnam Rûn chhung inkhawma a sawite khan mipui an lawm a, umpha zel se. Zu, Kawngchhia, siam that an nghakhlel zual a, School Education System siam that te, sorkar liam ta kha mipui thlir danah pawh School Education-ah te, Health Department-ah te, PWD leh P&E-ah te fail-in an hre leh zual a ni.   Tin, Kuthnathawktute ngaih pawimawhnaah tan lak a ngaihzia kan hmu a. Kuthnathawktu peng hrang hrangte sorkarna lungawi an awm mang lo niin a hriat theih. Hei mai a ni lo, Brig. T.Sailo khan, kan ram leilung a fangkual hneh a, buh leh thlai siam theihna zawng zawng siam nise, kan ram hi ei leh barah a intodelh thei tih a finfiah a. Hei hi ngawrh taka hmalak zui a tul. Kutdawh hnam kan nihna bansan thei zawnga hmalak a hun tih hi, in scheme estimate lo siamah a tel a nih pawhin hmalak dan ngaihtuah nghal a, heti lama remhria leh taima hmalaktir nghal a tul hmel hle a ni.   Ngaihdamna changtu MNF ministry thar hian mi mawl thurawn hi lo pawm ve teh se. LALPA Pathian hming hi a narana lam lovin, thinlung takin ‘Pathian leh kan Ram tan’ i ti zel ang u. Ram hi Lalpa ta a nih kan pawm a nih chuan, Lalpa min pek kan ram hi duat takin enkawlin, humhalh ngam ila, a sawiah chauh Nationalist lovin a taka lantir hi Pathian thil tum pawh niin a hriat theih.