ZALEN January 15, 2026: MNF Office Bearers Meeting chu vawiin khan Mizo Hnam Run-ah neih a ni a. MNF President Zoramthanga chuan a kaihhruai a, party thil pawimawh sawihova passed a ni a. Resolution siamin lungrual takin an pawm.

An resolution siamah chuan kum thar 2026 tluang taka an chuangkai thei lawmawm an ti a, Pathian hnenah lawmthu an sawi a, Pathian leh kan Ram tan tiin MNF chuan theihtawp chhuahin hma an la zel dawn a. Zoram mipui zawng zawngte Kumthar chibai an buk rualin, ram leh hnam tana theihtawp chhuaha thawhhopui atan an sawm a ni.

Party President Zoramthanga kaihhruaina an ring tawk a, inpumkhatna leh thawhhona tha tak nen ke pen zel an tum a, Mizoram Sawrkar tha tak siam leh turin theihtawp an chhuah zel an tum tih an tarlang.

Aizawl Municipal Corporation Inthlan lo awm turah MNF chuan Candidate tha tak tak, an nei dawn a, a lawmawm an ti a, Aizawl khawpui hmasawnna leh than zelna turin AMC Election lo awm turah hian hnehna sang tak an chan ngei an ring.

Ram rorelna ah Opposition Party ni chungin MNF chuan hniam lam aiin san lam panin, nasa takin hma an sawn an ti a, Sinlung Hills Council Election leh Dampa bial By Election-ah Ruling party hnehin chakna an chang a, LADC Election neih zawh takah MNF MDC an tling tam ber a, Village Council By election hmun hran hranah hnehna an chang deuh vek a, he an chakna hi Pathian leh Mipuite tanpuina leh duhsakna vang a ni tih an hriat thu an tarlang a. AMC Inthlannlo awm tur leh Election dang awm zel turah pawh hnehna chan zel an ringin an beisei bawk.