Aizawl November 10, 2022 : ZPM Leader Lalduhoma chuan Congress party atangin ram rawngbawr a har tawh niin a sawi a, MNF chuan Krismas vawikhat bak an nei tawh lo, tiin, UCU-a awm mek ang an ni a, Chief Minister nilai kutah ram budget mipuiin an dah ngam tawh lo, a ti. ZPM chu tunah hian Mizorama political party zinga insawhnghet ber niin a sawi bawk. 

Saiphai-a Nilaini zana vantlang inkhawmah thu a sawi naah kan rama political party te dinhmun sawiin, Lalduhoma chuan, “Tun dinhmunah chuan ram rawngbawl hi Congress party atang chuan a har tawh a, India ram pum thlir pawhin Congress party tan dinchhuah leh hi beisei chi a ni rih lova, chuvangin ZPM-ah hian an theihna leh thiamnate hmanga ram rawngbawlpuiah kan sawm a ni,” a ti a, “Chutiang bawkin MNF party hian Krismas vawikhat bak an nei tawh lo tih a hriat a. Tunlai thil awmzia ngun taka thlir chuan mipui hian kan ram roreltuah hian kan pawm tawh lo tih a lang a ni; engvang nge kan tih chuan a hruaitu lu ber hian a tichhe vek tawh a, ICU-ah an awm mek a ni. Tuna kan Chief Minister kutah hian kan ram budget hi mipuiten kan dah ngam tawh lo a ni,” a ti bawk. 

ZPM chungchang sawiin, “ZPM hi party naupangte kan ni a, kum 2018 khan party pawh kan la ni lova, Tangrual Pawl angin inthlan kan hmachhawn a ni. Chuti chung chuan Mizoram Assembly House-ah opposition party lian ber kan ni a, 2018 hmu lama inthlan kan hmachhawn reng rengah pakhatna kan nih loh pawhin pahnihna kan ni chho ta char char a. Tunah hian Mizorama political party-ah chuan a insawhnghet ber kan lo ni ta a ni. Nitinin mi tharin min rawn zawm zel a, Pathian leh mipuite zarah sawrkarna kan chan ngei pawh kan inring a ni. Pathian zara sawrkarna kan chang a nih chuan hmasawnna ruhrel kan ngai pawimawh dawn a, chung zinga pakhat chu power a intodelh a ni."

"Kan sawrkar huna kan khuah tur hi lui panga kan thlang fel tawh a, chung zingah chuan ngaih pawimawh bik leh tih hmasak tur pathum kan thlang fel tawh bawk a ni. Kawng tha te hi a pawimawh em em a, inkalpawhna kawng tha ka neih theihma tura hmalak pawh hna hmasa berah kan nei dawn a ni. Kuthnathawktute hi kan ram innghahna an ni a, hêng ho hi kan chawikan loh chuan kan ramin hma a sawn tak tak dawn lo. ZPM chuan kuthnathawktute hi kan ngaih pawimawh ber an ni a, research based in mithiamte rawn chungin thlai thar kan leisak dawn a, chutiang bawkin chhungtin ten kan eizawnna a in ang vek lova, kan eizawnna bultanna tur atan Hand Holding policy tha tak kan nei a ni. Thalai lehkathiam enterpreneur lama tui tan hmachhawp tam tak kan nei bawk a, awlsam zawka loan an puk dan turte kan siam dawn a ni,” a ti bawk.