Aizawl March 2, 2023 : Mizoram Legislative Assembly Session neih meka ruling party-te khawsak dan chuan mipui nuih a ti zain beisei a bo hleah MNF chuan an ngai a. House zahawmna an tihniamin an che nawi hle a ti.

ZPM MLA thenkhat House-a kuhva lo thial nuau nuau te, Minister bengek lo hawlh mawlh mawlhte hmuh tur an awm a. Speaker zahawm tak MLA-in dan an han hrilhfiah a, an han inhnial zuite kha House-a thil hmuh tur vang tak a ni.

MNF chuan, "Member thenkhatin Health Care bill chungchang Health Minister an zawhna, Health Minister-in chan theih a nei miah lo leh House Leader chhang tura a ti ringawt mai te kha a mak hle a. House Leader-in a chhan deuh ngai Minister hi chu an awm zeuh zeuh thin a, hetianga zawhna pumhlum chhan theih loh tawp mai hi House-a a thlen vawikhatna niin a lang," an ti.

Sawrkar atanga bill lut, Minister pakhatin a han hnial kalh chiam maite kha thil thleng ngai lo, ama sawrkar ngei rintawk lohna lantirna dik tak a ni.

Hei lo pawh hi Ruling MLA-te nawina sawi tur a awm nual a. House Leader hovin thubelh chian dawl lo sawi an nei nual bawk a. House hi a zahawm a, thu belhchian dawl lo sawina hmun tur a ni lo, tih hre turin ZPM MLA-te an chah.

Mizoram rorelna sang ber zahawmna humhim hram hram tur leh inzir ve deuh turin ZPM MLA leh Minister-te MNF chuan kan ngenin kan chah a ni.

Hetih rualin Opposition MLA te House zahawmna vawnhim kawngah leh an mawhphurhna hlen kawngah an fakawm an ti a. Leader of Opposition kaihhruaina hnuaia Sawrkar khalhngil kawngah leh sawrkar kallai thlawp an tul hunah tlawm kawngah a nachang an hria in, an thawhrimna a chhuanawm an ti.

MNF Legislature party te thil diklo phawrh chhuah leh sawisel ngaihna huna an huaisenna a ropui an tiin, khalhngil ngai sawrkar hrawn mek khalhngil kawngah huai taka pen zel turin an ring tawk a. An tan MNF Party chu huaisen takin a ding reng dawn a ti.