ZALEN November 20, 2025: LADC Inthlanpui neih turah Zoramthanga, MNF President leh MNF GHQ hruaitute chuan Lawngtlai District khaw hrang hrangah campaign an nei a, ZPM Sawrkar chu a nghinin an nghing dul dul tawh a, pahthlak ngei ngei a ngai a ti.

Campaign Directorate MNF District Hqrs. Lawngtlai buatsaihin Thingkah khuaah leh Areopagy, Lawngtlai Town-a public meeting ah MNF President Zoramthanga chuan, "LADC Inthlanpui lo awm tura Candidate ruat thuah Gen. Hqrs. leh Lawngtlai Dist. Hqrs. thu a inhmu rem em em a, bul kan ṭan tirh atangin engkim hi Pathian rem ruatpuina niin kan hria a, LADC Inthlanpuiah hian Pathian leh mipuite zarah Sawrkarna kan chan ngei pawh kan beisei tlat a ni," a ti.

MNF President chuan ZPM Sawrkarin ram leh hnam pawi an khawihna te sawiin, "ZPM an rawn Sawrkar a, kan Airport neihchhun hralh an tum nghal a, thisen leh nunna tam tak senga kan neih, a bika kan humhimna - ram neitu nihna leh chumi chunga thuneihna kan neih India Danpuia Article 371(G) chu awmze nei lovah rawn chhuahin kan ram tana pawi em em FCAA 2023 an pawm zui bawk a, ZPM Sawrkar hian kan ram chunga kan thuneihna kha an hlip vek a ni. Autonomous District Council ah pawh Article 371(G) bakah 6th Schedule hmanga inhumhimna thuah hnih kan neih kha awmze nei lovah an chhuah a, Central kutah pein kan thuneihna zawng zawng min chhuhsak vek a, hei hi ram leh hnam pawi sawina a nih avangin hei vang ringawt pawh hian State ah leh LADC ah ZPM Sawrkar hi paihthlak ngei ngei a ngai a ni," a ti bawk.

Zoramthanga chuan, "Dampa Bial Bye-Election neih zawh takah pawh Chief Minister Pu Lalduhoma hova thapui chhuahin 'ZPM candidate vote duh lo chuan Lalduhoma in duhlo tel tihna a ni' tih te leh, 'ZPM Candidate in vote chuan ZPM Policy leh Sawrkar in vote tihna a ni' ti te-in inzuar nasa hle mahse Dampa bial mipui te'n ZPM Sawrkar chu an hnawl a; State Sawrkarah bûkin an awm a, Dampa bialah leh tunhnaia inthlanna apiangah mipuiin an buk tling zo tawh lova, paihthlak an ni ta zel a ni," a ti a. CM khawnbawltu Adviser te meuh pawhin banna an thehlut a, ZPM Sawrkar chu a nghinin an nghing dul dul tawh a ni," a ti.