ZALEN June 8, 2026 : Mizo Hnam Run Chhung Inkhawm vawiina neih-ah MNF chuan Rajya Sabha Election 2026 atana an Candidate puanna an nei a, MNF Legal Board Treasurer ni mek Zothansangi Hmar chu MNF Candidate atan ruat a nih thu MNF Sr. Vice President Dr. R. Lalthangliana'n a puang.

Zothansangi Hmar hian hemi hnu hian Mizoram Legislative Assembly Commissioner Zothansanga Ralte hnenah nomination a file nghal a, he hunah hian Leader of Opposition Lalchhandama Ralte; Er. H. Lalzirliana, MLA leh Laldawngliana, MLA te bakah MNF Legal board member te leh party mi engemaw zatin an tawiawm a ni.

Nomination a file zawh hnu hian Zothansangi Hmar hian chanchinthar lawkhawmtute zawhna chhangin, tunah a dinhmun chu chan harsa tak a nih thu a sawi a, opposition an nih avangin a tan beisei awm loh lam pang a ngaihtuah loh thu leh MNF party-ah thalaite tan hmun a awm zia pholangtu a nih thu a sawi rualin he dinhmuna luah tirtu MNF hruaitute chungah lawmthu a sawi.

MNF Vice President leh Leader of Opposition ni bawk Lalchhandama Ralte pawhin an tan beisei a bo tih ngawt theih a ni lo a ti a, MLA dangte pawh an biak kual tawh thu sawiin, Rajya Sabha MP thlanah hian anti-defection law hman a nih loh avangin eng pawh thleng thei a ni. 'Aiawt te chu kan chiah veng ang chu,' a ti.

Zothansangi Hmar hi Advocate Rualkhuma Hmar (L) leh Rosangzuali te fanu a ni a. College Veng, Aizawl ah an cheng. Zirna lamah B.A, (Political Science) LLB niin, kum 2015 atangin Ukil hna a thawk tan a. MNF Ministry term hmasa khan Asst. Public Prosecutor-ah ruat a lo ni tawh a. Private Law Firm neiin Ukil hna a thawk mek a ni.

MNF Legal Board Treasurer a nih mek bakah Mizoram Hindi Board leh Mizo YouTuber Association te tan Legal Adviser a ni mek bawk.

Kum 2015 khan Arvind Kejriwal lehkhabu "Swaraj" a letling a. Kum 2016-ah publish niin he lehkhabu "Swaraj" (Mahnia Ro Inrel) hi lehkhabu lehlin tha thlan chhuah zingah Top 5-ah a lang phak a ni.