Aizawl April 13, 2023 : Mizo National Front, General Headquarters, Mizoram Aizawl chuan Zoram Medical College (ZMC) tihchangtlun zel a ni chu lawmawm a ti a. Hripuiin leng karah pawha theihtawp chhuaha medical College tihpuitlin nana hmalatu Chief Minister Zoramthanga kaihhruai sawrkar leh Health Minister Dr. R. Lalthanglianate thawhrimna chhuanawm an ti.

MNF chuan, "Eptu party thenkhatten ZMC chu sawrkarin ngaihthah leh enkawl thaloah an puh thin laiin, nimin lawka ZMC-a MBBS zirlai hmasa ber (2018 batch)-te result tihchhuah a ni khan ZMC chu sawrkarin a ngaihthah lohzia a tilang a, hei hi Mizoram tan mellung pawimawh tak a ni. Kha tah khan exam beitu zirlai 95 zingah mi 68-ten hlawhtlinna an chang kha kan lawmpui hle," a ti bawk.

MNF chuan thuchhuah an siamah ZMC chungchanga sawiin, "Covid-19 hripui vanga hun harsa leh khirh karah Zoram medical College chu Dedicated Covid Hospital-ah puan a niin, hemi avang hian MBBS Zirlaite pawhin harsatna tam tak an tawk a. Harsatna tam tak karah zirlai hlawhtling te kal zelna turah MNF chuan duhsakna a hlan a. Hlawhtling ve lo te tan Mizoram University-in exam a buatsaih leh turah hlawhtlinna chang ngei turin duhsakna a hlan bawk," an ti. 

Internship chungchanga hmalakna sawiin, "MBBS zirchhuak tharte hian internship an tan thuai theih nan Health Minister Dr.R. Lalthangliana chuan chak takin hma a la mek a, National Medical Council-te nen indawrna an kalpui mek a, hei hian kum tharah chuan Mizorama Doctor indaihlohna pawh engemaw chen a phuhruk dawn a ni," an ti bawk.