Aizawl March 23, 2023 : MNF Thalai chuan thuchhuah siamin MNF sawrkar chuan Lunglei leh chhim lam mipuite'n hmasawnna rotling leh tha zawk an neih theihnan PM-DevINE hnuaiah Lunglei by pass road siamna atan cheng vaibelchhe 303.6 senna tur project a thehlut fel tawh a, kumin 2023-2024 chhung hian a hlawhtlinna hmel hmuh hman ngei an beisei tih an tarlang. 

MNYF chuan Union Cabinet meeting in a  pawm tawh PM-DevINE hnuaiah hian kum 4 chhung atan vaibelchhe 6600 chu hmarchhak bial bik hmasawnna tura dah a ni, an ti a. Hemi hnuaiah hian Chief Minister Zoramthanga hmalakna in Mizoram chuan Aizawl By-pass road siamna tur cheng vaibelchhe 500 leh Bamboo Link road laihna turin cheng vaibelchhe 100 a hmu tawh a ni, an ti.

MNF Thalai chuan, "Kum 2023-2024 chhung hian Lunglei By-pass road siamna tur cheng vaibelchhe 303.6 hi PM-DevINE hnuai atangin Mizoram chuan a hmu leh ngei tura ngaih a ni," an ti bawk.

Congress-in Lunglei by pass road suam an dah chungchang sawiin MNYF thuchhuah chuan, 2018 Mizoram Budget session March ni 15 a neih ah khan Congress party chuan November 2018-a MLA inthlanpui neih turah Lunglei leh chhim lam mipui rilru kawihher theihna a nih beiseiin Lunglei by pass road siamna atan a hming lekin special NEDP scheme an vuahchawp hnuaiah Vaibelchhe 10 dah turin thu in ruahmanna a siam a. A taka sum hmuh chu vaibelchhe 9 chiah a lo ni leh si a ni. Congress sawrkar in a hming lek a cheng vaibelchhe 9 a dah hi Politics hmang a mipui rilru hruaikawi tumna mai a nih avangin Lunglei by pass road, double lane kawng siamna tura hman tham a nilo hrim hrim a ni, an ti.

MNYF chuan, "Eptu lam ten nasa takin Zoramthanga kaihhruai MNF sawrkar hi sawisel thin mahse ram tana rotling hmasawnna siamturin MNF sawrkar chuan theihtawp a chhuah a, Covid-19 hrilengin nasa taka min tihbuai karah Mizoram hmun hrang hrang a hmasawnna hmelthar hmuhtur awm chhozel hi lawmawm a ti takzet a ni," an ti.