ZALEN November 3, 2023 : Congress chuan 2018 inthlanpui hma khan MNF chuan thalai te hnenah eizawnna tha leh hna tam zawk siam sak thei turin an intiam nasa hle a, chuti chungin hna lak a tam tawk lo hle tih an ti a, an sawrkar chhunga an hna lak zat an sawi chu a dik tawk lo niin an sawi.

Congress Media chairman Lalremruata Renthlei chuan, "MNF sawrkar chuan an sawrkar tun kum 5 chhungah ah hian hna 7983 lai thalai te hmuhsak angin an inchhal a, he thil ah hian thu dik tawk chiah lo a awm a. Hna 7983 pek an tih ah hian 4437 chu department chhunga promotion hmanga lak niin, hna 1394 chu Departmental Exams hmanga hnawhkhah a ni. Chumi awmzia chu 2018-2023 chhungin MNF sawrkar hian hna 2218 chauh direct recruitment hmangin a la tihna a ni," a ti.

Tunah hian Mizoram police ah ringawt pawh hnaruak 4194 lai a awm a. Covid vanga buaina chhuanlamin Home Minister chuan an hnawhkhah theih loh thu a sawi a. Congrress sawrkarin a din polytechnic pathum pawh an enkawl chhunzawm thei lo va, Faculty pawh a dah thei lo niin an sawi bawk.

Renthleia chuan, "Kan hriat theuh angin tunhnai Assembly Speaker leh Assembly Secretariat lama an hotu te chetdanah mipui rilru a ti na in, Thalai te phei chu beidawnna a siam nasa hle a nih ngei theih nan theihtawp kan chhuah dawn a ni. MNF sawrkar hnuaiah hian MNF mi leh sa induhsakna a tam zia kan hre theuh bawk a, SEDP hnuaiah Zirtirtu 771 an lak pawh MNF mi leh sa vek an ni," a ti.

MNF sawrkarna hnuaiah thalai te ruihlo bawih ah an tang nasa in ruihlo a hluar a. Tun kum 5 chhung hian thalai 259 chu ruihlo vangin an thi a. kumin 2023 chhungin drugs leh a kaihhnawih kg 160 chuang zet man a ni a, nikum 2022 khan Heroin No. 4 pawh kg 152 man a lo ni tawh bawk a ni. Kuminah pawh tam tak man a ni tawh an ti.