Aizawl December 14, 2022: Rajya Sabha thlasik thutkawm, December 9, 2022 a neihah Rajasthan  BJP MP Kirodi Lal Meena Private member bill 'The Uniform Civil Code in India Bill 2020' sawiho dilna a put luh chu MNF chuan an thlawp loh thu leh bill hi passed anih lohna turin a tawp thlengin an dodal tur thu thuchhuah an siamah an tarlang a, UCC Bill-2020 chu Mizoram tan hlauh tur awmin MNYF chuan an hre lo bawk.

MNYF chuan Rajya Sabha rorelna a private member bill pakhat putluh anih chungchangah hian Mizoram chhunga political party thenkhat ten Mizo mipui rilru hruaisual thei zawnga thu an thehdarh chu pawi an ti a. He Bill hi sawiho tura putluh chauh a la ni a; bill hi passed a la ni lo tih mipuite hriat an duh, tih an tarlang bawk.

MNF Thalai chuan Mizoram Rajya Sabha MP K.Vanlalvena chu thu dik tawk lo hmangin MPCC Media Deptt ten an bei an ti a. "Kan ram leh hnam, kan Kristianna humhimna tura a theihna zawng zawng hlantu, Mizoram in Rajya Sabha MP kan neih chhun hming hi rinthu leh thu kaihlek hmanga rawn lam chuak tawh lo turin thurawn kan pe nghal a ni," an ti.

"MNF chuan kan hnam nun leh sakhua humhima a awm theihna tur te, Zofate rorelna pakhat hnuaia kan awm theihna tur leh hnamdang awpbehna lak a ta kan boral mai lohna turin kum 1966 khan India sawrkar lak aṭangin zalenna a lo sual tawh a. Kum 56 liamta a MNF thu ken kha vawiin thlenga MNF dinna a la ni reng a ni," an ti bawk.

MNYF chuan, "MNF hmalakna avangin India Danpui Article 371-G ah Mizoram tan bik inhumhimna dan tha tak siam a lo ni tawh a. Uniform Civil Code Bill-2020 chungchangah phei hi chuan Mizoram tan hlauh tur awmin a hre lo a ni," an ti.

India constitution ah Mizote himna tur ziahlan a nih thu pawh tarlangin, "Parliament dan siam chu Mizoram Legislative Assembly in a pawmpuina hmanga thutlukna a siam a nih loh chuan Parliament dan siam engpawh Mizoram ah hman ve theih a ni lo ang," tiin, "Parliament dan siam engmahin, Mizo sakhua leh khawtlang tihdan emaw; Mizo hnamdan leh kalpuidan te, Mizo hnam tih dan kalphung anga inawpna kalpuina leh hnamdan zulzui a thubuai remna thilah te, ram neitu nihna leh a neitu nihna thlak thil ah te hian pawnlam rorelna in MNF hma lo laktawhna avangin min tih buai ve theih loh thu India Danpui ah chiang taka ziahlan a ni bawk," an ti..