Aizawl: MNF Thalaite chuan nimin khan SIPMIU-in Aizawl khawpui hmun hrang hranga vantlang inthiarna an siamte chu a hmunah kalin an endik a, sum hman dik lo a awm ngei nia an hriat thu an sawi. MNF Thalaite hian Bawngkawn, Thuampui, Bethlehem Vengthlang, Mission Veng South, Ngaizel, New Market, Millenium Center bul, Zarkawt, College Veng leh Zemabawk Bazarah te kalin an endik a. MNF Thalai Vice President Lalremruata Chhangte chuan thu sawiin, “Èk in pakhat sak nana Rs. nuai 5.5 lakhs ruahman a nih laia  nuai 17.88 zel sum seng anga an chhuah fai vek ringawt mai hi hriat thiam har kan ti a, sum hmanral dan a dik lo hleah kan ngai a. Ek in thenkhat phei chu hman hleih theih lohvin a awm a ni,” a ti. Lalremruata Chhangte chuan SIPMIU-in vantlang ek in an sak chu Assembly Estimate Committee Chairman PC Zoramsangliana hovin September 2017-ah an enfiah tawh nia sawiin to uchuak hleah an ngaih thu Assembly House-ah an report niin a sawi bawk. MNF Thalai chuan hetiang ek in siam tur hian Mizorama hmanraw tha ber ber pawh hmang se nuai 10 bak sen a ngai dawn lo tih sawiin a mawhphurtu ber chu Minister Zodintluanga a ni an ti bawk.