Aizawl September 5, 2024 : Vawiin khan Mizo National Youth Front (MNYF) bul tumin Aizawl khawpui chhunga motor kawng chhe lutuk thawmthat hnatlang neih a ni a. He hnatlang hi MNF General Headquarters Treasurer Lalruatkima chuan hnatlang a telpui a ni.

Hnatlang bultanna ah thusawiin, MNF Gen. Headquarters Treasurer Lalruatkima chuan, "Vawiin ah Kawng chhiat lutuk avanga, Mipui leh Lirthei khalh tute thlavang hauh a, Kawng siamtha thuai tura sawrkar muthlu kaihthawhna tura, Aizawl khawpui hmun lunlai ah MNF Thalai bultumin, Kawngchhe siam Hnatlang koh a ngai ta hial mai hi a pawi a ni," a ti.

"Aizawl khawpui chhung kawngchhia hi MNF sawrkar laia an siam a ni, an ti a, A dik. MNF sawrkar khan kawng nasa takin a siam thin a, kan kawng pawh a tha thin. Hun a lokal deuh a, Traffic heavy lutuk avangin kan kawng siamte chu kum tin danin repair a ngai thin a ni. ZPM sawrkar hian Kawng siam ve chu sawi loh mi kawng siam sa pawh repair thei lo kalphung thar kan nei hi a vanduaithlak hle a ni," a ti.

Ex Minister Lalruatkima chuan, "ZPM sawrkar ve leh a PWD hna hmasa ber chu Chief Minister In Chawlhhmun a mi kawt lai chu Cement Concrete a siam te, PWD Minister kawt lai Sawrkar sum hmanga siam nghal a ni, An mahni in ngai pawimawh lo khan mipui tan tiin kan kawngpui te hi lo ngai pawimawh hmasa zawk se vawiin dinhmun hi kan thleng lo tur a ni," a ti bawk.

MNF Thalai vice president Lalnunmawia Pautu pawhin, "Aizawl khawpui kawngchhia hi MNF party chuan a ngai pawimawh a, motor kal harsa leh mipui nunphung ti khaihlak khawp a a chhiat tak avang hian MNF Thalaite chuan kawngchhe zual lai, Canteen kual, Vanapa Hall bul leh Khatla kawn leh a chhehvel kawngchhia siam that hnatlang kan ko ta a ni," a ti ve bawk.