Aizawl: Nimin khan Mizo National Youth Front hruaitute chuan Vice President Lalremruata Chhangte hovin Keitum leh Khawlailung inkara Tuichang lei (bridge) dawh hnathawh mek chu a hmunah tlawhin an enfiah. MNF Thalai Vice President Pu Lalremruata Chhangte chuan, “Kumin chhunga lei dawh zawh hman tur ni si, vawiin thlenga hnathawh tawh hmuh mumal tur la awm lo hi a lungchhiatthlak hle a, Mizoram sorkar inthlahdah vang leh kawngpui ngaihthah vang liau liau a ni,” a ti. Tuna lei hman lai hi kum 1983 a dawh tawh niin motor veivak a tam vangin a hmantlak loh lek lek tawh a. Lei siam nana hman thingzai leh a kilhna thir thenkhatte a mawihin a tuiek nasa tawh hle a, motor lian phei chu 10 mt aia rit phur tan zawh phal a ni lo. Lei thar dawh hna hi December 1, 2016-a tan niin kumin 2018 December 1-a thawh zawh hman tur a ni a; M/S Sadguru Engineers & Allied Services Pvt. Ltd. Guwahati te thawh niin a thawh nan hian Rs. nuai 751.89 ruahman a ni.