ZALEN August 06, 2026 : Mizo National Youth Front (MNYF) chuan an President thar Gogo Lalremtluanga hoin a vawi khatna atan meeting an nei a, Chief Minister zin haw chu pawndum nen hmuah an tum.

MNF thalaite chuan Chief Minister Lalduhoma’n ram leh hnam inhumna Inner Line Permit (ILP) a sawi derthawng leh mipui tithlabar zawnga thu a sawi chu pawi an tih thu an sawi a. CM Lalduhoma chu a thu sawi sut tur leh Zoram mipuite hnena thupha chawi tura an phut thu an sawi bawk a. Chief Minister chu dawt sawi bansan tawh tura an phut thu sawiin, CM zin haw chu pawndum nena hmuah an tum thu an sawi.

MNYF chuan MIGAHTA ten an dikna chanvo humhalh nana hma an lakna chu awm an tihpuiin an thlawp tih an sawi a. MNF sawrkarin zirna in a lo provincialize tawh ZPM sawrkarin a enkawl chhunzawm thei lo chu sawrkar rorelna fel tawk lohzia leh mumal lohzia tilangtu a ni an ti.

Sawrkarin lirthei atanga Cess a lak belh teuh hnuah pawh kawngpui a chhe tulh tulh chu MNF thalai chuan pawi an tih thu an sawi a. Lirtheia veivakte’n nitin harsatna nasa tak an tawh laiin, sawrkar sum khawn Cess chu eng atan nge hman a nih tih chhanna sawrkarin a pe thei lo chu lang tlang sawrkar a nih lohzia lanna a ni an ti bawk.

Mizoram sawrkar Power & Electricity Department in smart metre thar an kalpui chuan nasa takin mipui leh khawsak harsa zawkteah nghawng a nei mek niin MNYF chuan an sawi a. Sawrkarin mipui tana harsatna a siamsak mek kawngah MNF thalai chuan a zir chiang ang a, a tul angin Mizoram mipui tan hma lak a ni ang an ti a ni.

MPSC chungchanga MZP hma lak mekna chu MNYF chuan an thlawp tih an sawi a. MPSC hian ZPM sawrkarna hnuaiah tihsual an neih bakah mi tam tak rilru an tina mek niin MNF thalai chuan an sawi a. Tun hnuah Mizo thalaite rin ngam ni turin ZPM sawrkar hian an lo intiam tawh angin MPSC chu thuam chak thuai turin an phut a ni.