ZALEN November 6, 2024 : Sinlung Hills Council mipuite'n MNF-ah rinna nghata sawrkarna min pe hi MNF Tuivawl North Block chuan lawmawm a ti a, mipuite hnenah thinlung takin lawmthu a sawi a. Chutihrualin 6-New Vervek Constituency inthlan result chu an pawm thei lova, inthlan that leh ngei an phût a, an pawm loh chhan te an sawi bawk.

Sinlung Hills Council inthlan hi thianghlim taka kalpui a nih an beisei lai renga 6-New Vervek Constituency-ah thil fel lo tam tak a awm ngei nia hriat theih a awm erawh pawi an ti a, hemi-a mawhphurtu Returning Officer (RO) chungah a tûl anga hma la nghâl tûrin sawrkar an phût.

1. Vote chhiar chungchângah round tin mipui hriata puan tûr a nih laia puan a nih loh hi kan hrethiam lo.

2. New Vervek Postal ballot-in dârkar thuma vote chhiarna hmun tûr a thleng tlai bîk leh, hemi chhûng zawnga ballot box hi BLO, ZPM Official candidate fanuin amah chauha hemi hun chhûng a lo awmpui hi kan hrethiam thei lo.

3. Vote hi ṭum thum chhiar a ni a, total vote a danglam vek zêl a. Vote tla zawng zawng leh candidate te total vote a inmil lo vek.

4. Vote thi (invalid vote) Counting Agents te hriatpuina loa danglam leh hi kan hrethiam thei lo.

5. Heng thilthlengte avâng hian Tuivawl North Block chuan 6-New Vervek Constituency inthlan result hi kan pawm thei lova, inthlan ṭhat leh ngei kan phût tlat a ni.