Aizawl: Mizo National Youth Front (MNYF) chuan nimin zing khan Chanmari kawnah fehchhuah programme a nei.   Fehchhuah programme ah hian thu sawiin MNYF President Lalrinawma chuan, “Mizoram sawrkar hian NLUP atan hian cheng vaibelchhe 2800 an hmang tawh a, NEDP atan cheng vaibelchhe 2000 an hmang tawh bawk a; a vaiin cheng vaibelchhe 4800 hmang tawh mah se, kan ram economy-in a than phah chuang lo a. NLUP-a an hmalakna 90% chu agriculture kaihhnawihah hman a ni a, mahse, agriculture lama kan thar chhuah a tlahniam thung a ni,” a ti.   Thusawitu dang Lalruatkima MLA chuan, “Congress sawrkar NLUP leh NEDP te hi sweet a fûnna mawi taka tuam ang chauh a ni a. Mipuite rethei takin siam ila, an retheihna denchhenin sum leh paiin vote kan lei mai dawn a ni tih hi an changvawn a ni a. Vawk note nuai chuang zet an sem tawh laiin vawksaah kan intodelh em, vawksa man a tlawh pham em? Ar note nuai sawm chuang an sem tawh laiin arsaah kan intodelh em, arsa man a tlawm phah em? A la tlawm ngai reng reng lo a ni. Chu an bumna thang atangin Zoram mipuite kan harh a ngai a ni,” a ti.   AMC Councillor Laltlanzova Khiangte pawhin sawrkarin ram chhunga chhiat tawhnate a ngaihthah thu sawiin, “Zoram mipuite hian tu nge disaster management minister pawh an hriat ka ring lo,” a ti a, “AMC-a MNF sawrkar chuan mipuite mamawh pek tumin theihtawp kan chhuah a. Chutiang a nih laiin kan ram hruaitute chuan SIPMIU chu sum siam nan an hmang a. Dihmunzawlah man to takin in an thiat a, Aizawl khawpui chhungah êkin te reuh te te to takin an sa a. Sawrkarin Aizawla veng 83 awmah motor 50 chuang hret chauh an lei a, chung motor pakhat cheng nuai 10 vel zela lei theih tur chu cheng nuai 20 velin an lei a, SIPMIU hi ram hruaitu tute emaw chuan sum siam nan an hmang a ni,” a ti bawk.