Aizawl: Nimin khan Mizo National Youth Front (MNYF) Headquarters chuan Sikulpuikawn, Melriat, Aibawk leh Sialsuk-ah te ‘Sikpui Fehchhuah’ campaign an nei a, heng hmunah te hian K. Sangthuama MLA, MNYF President Er. Lalrinawma MLA, Lalremruata Chhangte MNYF Vice President leh HC Lalmalsawma Zasai, MADC MDC ten thu an sawi a ni. Sikulpuikawna hun hmannaah hian K. Sangthuama chuan thu sawiin, “Congress party-in kum 25 chhung zet chu Zoram siam thatna hun an nei a, siam that ahnekin retheihna leh ruihtheih thil avangin inthahna a lo tam ta a. MNF kan sawrkar chuan SEDP hmangin he retheihna khur ata mipuite chhanchhuah kan tum a ni,” tiin a sawi a ni. Melriat-a hun hmannaah hian HC Lalmalsawma Zasai chuan, “Kan sawrkar hrawn mek hi sawrkar tlak an ni tawh lo a ni tih hi mite sawi dan a ni a, chhim lam hnaih zual Palak atanga Lawngtlai thlengin MNF chuan kan rawn la dawn a ni," a ti bawk. MNYF President Er. Lalrinawma chuan, “MNF chu sawrkar turin kan insingsa mek zel a, kan sawrkar loh chhunga eng emaw avanga kan party kalsante pawh lo haw tawh turin ka ngen che u a ni,” a ti. Lalremruata Chhangte, MNYF Vice President pawhin tuna sawrkar kan hrawn mek chu Bang Ministry a nih thu a sawi bawk.