Aizawl: MNF Thalai (MNYF) chuan PRRS vanga vawk thi neitute hnenah zangnadawmna pe ngei turin Mizoram sawrkar an phut. Nimin khan Aizawl Press Club ah chanchinbumite kawmin MNF Thalai President K.Vanlalvena chuan vawk hrileng PRRS (Porcine Respiratory and Reproductive Syndrome) chu Mizoram sawrkarin sawrkar laipui thupek a awih loh vanga thleng nia sawiin sawrkar chu High Court-ah khin an tum niin a sawi bawk. March ni 6,2009 ah Trade & Commerce Department in C.Vanlalhmuaka, Champhai Zotlang hnenah vawk lakluh phalna ‘special permit’ a pe tih sawiin ram dang atanga vawk lakluh phalna chu Custom te pek theih chauh a nih avangin Trade & Commerce leh Deputy Commissioner, Custom Division Aizawl te chuan ni 1.1.2010 ah order intawm siamin special permit chu tihtawp anih thu an hriattir a. Mahse a hnu lawk ni 8.2.2010-ah Trade & Commerce chuan permit cancell tawh chu a tinung leh a, Custom, lam pawh an lungawi lo hle niin a sawi. MNYF President chuan PRRS lenna ram Myanmar atangin vawk 42036 chu special permit neitu Vanlalhmuak chuan a lalut a, heng zinga 1037 chauh endik a niin endik zingah hian PRRS vei 2 hmuh a ni a. A dang zawng hi endik lovin sem an ni a, heng atang hian vawk natna hi a darh ngei nia an hriat thu a sawi bawk.