Aizawl June 8, 2024 : Vawiin khan Mizo National Youth Front Hqrs Aizawl hruaitute chuan Durtlang leh Sihphir inkar kawng MNF hunlai atanga tihzauh hnathawh chu a hmunah kalin an en a. He project hi Central Road Infrastructure Fund Rs 4657 lakh hmuh hmanga siam niin Km 10.25 a thui a ni a, he kawngpui bik hi Cheng Nuai 3553 hmanga siam a ni.

He kawngpui zauh zawng hi metre 8 a ni ang a, motor chil tur chin hi metre 6 a ni ang. Kawngpui tha anih theihnana tul hrang hrang Retaining Walls, Hume pipes, RCC Slap culverts, Pucca side drains etc. pawh a tulna laiah siam vek a ni.

MNYF te chuan hetianga kawngpui tha MNF sawrkar Zoramthanga kaihhruaiin a lo ruahman hi ropui an ti a, Mizoram dung leh vanga kawngpui lian leh tha tam tak siam zawh a ni tawh leh siam mek zel tam tak la awm chu MNF sawrkar nachang hriat vang a ni an ti a, tunah hian hna hi 40% zawh tawh a ni.

Vawiin vek hian Sawrkar hmasaa Dy CM Tawnluia hmalaknaa Smart City sum hmanga siam Chite Veng Football Ground pawh MNF thalaite hian an tlawh bawk a. Chite Veng Field hi a tihzauhnan RCC-a a field dung tluan dawhzawm niin Cheng nuai 840 senna project-ah hian phullem phah niin cafetaria te pawh siam tel a ni a, April 2024 khan zawhfel a ni.

MNF thalaite chuan sawrkar hmasa hmasawnna hnathawhte enzui zel an tum a, chubakah sawrkar thar hmalakna te pawh a hmuna kalin kan vil reng an tum a. Vawiina MNYF-in project 2 an tlawh programme hi MNYF Vice President Lalnunmawia Pautu ho a neih a ni.