ZALEN November 1, 2023 : Mizo National Youth Front Vice President Zodinpuia chuan kumin 2023, November ni 7 a Mizoram inthlanpui neih turah MNF chuan Pathian leh mipuite duhsakna avangin sawrkarna chan leh ngei an inbeisei a, hnehna chang ngei tur pawhin theihtawp an chhuah tih a sawi.

Vawiina thuthar thehdarhtute a kawmnaah Zodinpuia chuan, "Tunah hian Mizoram a MLA bial 40 awmah MNF chuan bial 26 ah hnehna chan ngei kan in beisei tawh a, bial 14 dangah pawh MNF hmasawnna chak takin a kal mek a ni. Constituency hrang hrang dinhmun kan thlirin bial 9 ah Congress party nen fal takin kan inbuan mek a, MLA bial 4-ah hian BJP in min rawn hnaih ber a, MNF leh BJP inbeihna Constituency pali (4) ah hian ZPM member ten BJP candidate an pui tan niin thu kan dawng vek thung a ni," a ti.

MNYF Vice President chuan, "Mizoram inthlanpui lo awm turah hian MLA nih tum Nomination file mi 174 an awm a, heng zing atang hian criminal case nei mi 6 awmin, chung zinga mi 4 lai chu ZPM party official candidate an ni. Criminal case nei mi pali (4) ngawt vawrhchhuak tu ZPM party hian an candidate te sum lakluhna a thianghlim em tih pawh an ngaihtuahlo niin a lang a. Mi hausa leh milar ringawt buaipuitute hi kum 5 chhung ram rorelna fawng chelh turin mipuite’n enchhin tlakah an ngaih kan ring lo a ni," a ti.

Zodinpuia chuan Eptu party thenkhatin MNF hi a chhe thei ang bera puh a, mipui rilru hruaikawi tum thin mah se, Pathian leh mipuite zarah MNF chuan hengte avang hian sawrkarna chan leh ngei kan inbeisei a ti a, an tlin leh ngei chhan tur nia a rin te a sawi bawk.

1. MNF in ram hmasawnna hna tam tak a thawh avangin.

2. MNF chu Mizoram Political party zawng zawng zingah hruaitu nei tha ber a nih avangin.

3. MNF chu Mizo hnam venghim tura Pathian min pek a nih avangin.

4. MNF chu Mizo thalaite leh zirlaite ngaihsaktu a nih avangin.

5. MNF chu Mizo mipuite hnena politics dik min zirtirtu a nih avangin.

6. Ram leh hnam hmasawnna tura pawimawh, ‘Infrastructure Development’ din kawng ah MNF aia hnathawk tha an awm loh avangin.

7. Mizoram leh hnam himna tihder thawn a awm changin MNF chu sorkar laipui hlau lova hnial ngam leh do ngam thin a nih avangin.

8. Mizoram ramri humhalhna kawngah MNF aia huaisen an awm loh avangin.

9. Khawvel hmun hrang hranga Zofate kuahkhawmtu a nih avangin.

10. MNF sawrkar hnuaia hnalak ah sawisel tur a awm loh avangin.

11. MNF sawrkar hnuaiah chuan Buhfai leh Gas a hnianghnar thin avangin.

12. MNF chuan Kohhran leh Tlawmngai Pawl te nen thawhhona tha a neih thin avangin.