Aizawl August 1, 2024 : February 2023-a AH&Vety Department hnuaia contract a thawk tura lak Mobile Vety Unit te chuan kumin-ah hlawh an la lak loh avangin vawiin atang khan 'Work from Home' hmangin an lungawilohna an lantir.

Mobile Vety Unit te hi African Swine Fever dona kawng zau zawka hmalak a nih theihna tura lak an ni a, Doctor 26, Vety Field Assistant (VFA) - 26 leh Driver - 26 tunah hian an awm mek, anni hi RD Block tina awm tura lak an ni. Thudawn danin an thawh hlim atangin hlawh hi an la mumal lo a, kuminah hlawh an la lak loh avangin tun tumah hian 'Work from Home' hmangin an lungawilohna hi an lantir ta a ni.

Mobile Vety Unit te hi ran vulhtute an kawtkaia tanpui tura hnathawk tur niin Call Centre-in phone an dawn bawhzuaia thawkchhuak mai thei tura inring reng tur an ni.