American singer Selena Gomez chuan a thau avanga sawiselna a tawh chungchang a chhang let a, model a nih loh thu a sawi mauh mai! 'Lose You to Love Me' singer chuan TikTok Live-ah hemi chungchang hi a sawi chhuak a, a nihna chu pawm mai turin amah sawiseltute a ngen nghal bawk.

Kum 30 mi Selena Gomez hian natna chi khat lupus a vei a, a kal thlak a lo ni tawh bawk. Kum 2017 khan a kal hi thlak a ni a, a hriselna dinhmun hian amah pawh a nghawng ve hle. Hetiang karah hian a rihna a pung zel a, a thau tak em avangin troll pawh a tawk nasa hle a ni. 
Tun hnaiah troll a tawh nasat avang hian social media lamah amah sawiseltute pawh a chhanglet ve ta hial a, model a nih loh thu leh a rihna pung zel chu a duhthlanna a nih bik loh thu a sawi chhuak - mi nihna sawisel mai mai loh tur a nih chu. Hemi chungchang hi February 15 khan Vanity Fair interview-ah a lo sawi tawh bawk a, sawisel a tawk nasa viau niin a lang.

American singer chuan,"Ka chet velnate ka assistant hnenah ka thawn thin a, anni hian social media lama tarlan tur an lo thlifim leh thin. Social media-a ka thlalakte hi mi tam takin an comment thin a, chung zinga chona thar min pe theite chu ka team ten an lo thlang chhuak leh thin," tiin a sawi a, amah pawhin inenlet nan a hmang ve thin tho tih a lang. 

Chung karah chuan sawiselna a tam thin hle tih hai rual a ni lo a, amah ngei pawh rawn insawi fiahin, model a nih loh thu leh a nihna chu pawm sak zak turin fan te a ngen a ni.