India Prime Minister ni tura ruat (Prime Minister designate) Narendra Modi chuan naktuk tlai dar 6-a Rashtrapati Bhavan, New Delhi-a Prime Minister ni tura lakluh inkhawmah tel ngei turin Chief Minister Lal Thanhawla a sawm a, Lal Thanhawla duhsakna leh tawi-awmna a ngen nghal bawk. Chief Minister Lal Thanhawla hian Narendra Modi chu India Prime Minister atana ruat a ni chu a lawmpui thu hrilh in, amah lakluh inkhawma tel tura a sawmna chu lawm taka pawmin a tel ngei tur thu a hrilh nghal bawk. Chief Minister hian nimin khan Aizawl chhuahsanin New Delhi a pan nghal. Hetih lai hian, Chief Minister Lal Thanhawla chuan central-ah BJP leh a thurualpui NDA sorkar mahse, Mizoram Pradesh Congress chu a nghing lo tih Zirtawpni khan Congress Bhavan inkhawmah a sawi a. Prime Minister-ah State Chief Minister lo ni tawh an awmin state harsatna an hriatthiam thin thu te, tuna state pakhat (Gujarat) Chief Minister tum thum lai lo ni tawh (Narendra Modi), Prime Minister a ni tur chu India ram pumpuiin a thatpui ngei a beisei thu te a sawi a. Sakhaw thilah hlauhthawnna te chu awm deuh mah se, sorkar reng an duh dawn avangin an che hluar ngama a rin loh thu a sawi bawk. Lal Thanhawla chuan, Central-a Congress party an sorkar loh avangin Mizoramah Congress party-in a chhiat phah ngai loh thu te, Bairabi thlenga relkawng neih pawh Deva Gowda Prime Minister lai a nih thu a sawi a. "Deva Gowda khan State Chief Minister zawng zawng a kohkhawm khan CM-te chu kan lawm vek. A chhan pawh state pakhata Chief Minister lo ni ve tawh Prime Minister dinhmuna ding khan state-te harsatna chiang taka min hriatpui vang a ni," a ti a. "Kan duhthusamah phei chuan Prime Minister ni tur hian state Chief Minister lo ni tawh ngei nise tih hi a ni”, a ti bawk.