Indian Super League (ISL) player Lalthathanga Khawlhring (Puitea) chuan India rama football league sang berah Mizo ngei coach an awm ve theih hlan a nghahhlelh thu a sawi.

Aizawl District Football Assication (ADFA)-in silver jubilee an lawm puala Ningani zana sport-a tui mite nen inkawmhona (conclave) an buatsaiha panel-a thu zinga mi, Mizoram Premier League-a Bethlehem Vengthlang FC tana lo khel tawh, Puitea chuan Manipur chuan ISL team hrang hrangah coach an nei fer fur tawh tih a sawi a, hei hi Manipuri player an tam chhan pakhat niin a sawi bawk.

“Coach-te hi player thlan kawngah team thuneituten an thu an awih em em a, ISL-ah pawh Manipuri khel an tam theih chhan pakhat chu an coach-te vang hi a ni,” tiin a rualawh thu a sawi a ni.

Mizoram State Sports Council (MSSC) sponsor-a Dawrpui Multipurpose Centre-a inkawmhonaah hian ATK Mohun Bagan midfielder Puitea chuan ram pawna Mizo player khelten mahni ram an ngai thin lutuk chu tha lo a tih thu pawh a sawi a, “Khawi hmunah pawh football chu nuam ti taka kan khelh a ngai a ni,” a ti.

Conclave-ah hian thalai leh football ngainatu an fuankhawm a, Mizoram leh Indian football chungchang sawihovin zawhna leh chhanna hun hman a ni.

Football leh a kaihhnawih chungchang sawihonaah hian panel-ah Puitea bakah Mizoram pawna ball lo pet hmasa tawh leh thleng thui hmasa, S. Malsawmtluanga pawh a tel a. MSSC Secretary John Tanpuia MCS, MFA Senior Vice President Vanlalhruaia Pachuau leh ADFA Hon. Secretary Lalbiakhlua te an thu bawk.