Calcutta kawtthlera tuma ngaihsak hlawh lova thi sâwn mai mai turte hmangaihna kuta kuangkuaha, la khawm thintu, Mother Teresa chu September 4, 2016 khan Rome khawpuia St. Peters Square-ah Pope Francis-a’n Mi Thianghlimah a puang ta. Mother Teresa hi August 27, 1910-ah Albania rama Shkup khuaah a piang a. A hming tak chu Agnes Gonxha Bojaxhiu a ni. A nu leh a pa te hi Nepnawi Dawr (Grocery) siama eizawng an ni a. Eng emaw chen lehkha a zir hnuin India rama Darjeeling khuaa Loretto Convent-ah Zirtirtu hna a thawk a. Calcutta leh Darjeeling inkara rela a chuan laiin a hnenah Isua a inlar a. Loretto Convent chhuahsanin Calcutta khawlaia ngaihsaktu nei lo, riangvai leh chanhaite enkawl turin “ Missionaries of Charity (MC)” a din a. MC hian vawiinah hian khawvel ram hrang hrang 123-ah “Home” an din tawh a. Hnathawktu (Sisters) pawh 5,100 zet an nei a ni. Mother Teresa hi catholic ni mah se, Kohhran pawl hrang hrang leh sakhaw hrang hrang vuantute, Pathian awm ring lo, Communist-te pawhin Pathian aiawha mihring rawngbawltuah an pawm a. Mi Thianghlima puan a nih tur pawh hi an lawm a. September ni 4 hian Catholic chauh ni lo, mi chi hrang hrang St. Peter’s Square-ah hian an fuan khawm dawn a ni. Calcutta khawpuiah pawh Mahatma Gandhi pianchamphaphak, Gandhi Jayanti denchhenin October 2, 2016-ah khan Mother Teresa Mi Thianghlima puan a nih hi ropui takin an lawm a ni. A mihringpuite tana hna a thawh that avangin Mother Teresa hian chawimawina tam tak a dawng a. Hmun ren avangin a pawimawh zual chauh lo tarlang ila. 1) Honorary Order of Merit : Hei hi Kumpinu sawrkarin kawng hrang hranga hna thawk tha chungchuangte a chawimawina a ni. 2) Magsaysay Award: Heihi khawvel pum huapa hna thawkthate hnena Philippine sawrkarin a hlan thin a ni. 3) Bharat Ratna: India sawrkarin ram tana hnathawk tha chungchuangte hnena chawimawina sang ber a hlan thin a ni. India rama pianga seilian lo hnena a pek awmchhun a ni. (Vanneihtluanga chuan September 1962-ah Mother Teresa hnenah hian Padma Shri hlan niin a ziak a. (Riangvaite Hmangaihtu: Page 79) Doctor Astrid Lobo Gajiwala chuan Mother Teresa hnenah hian 1980-ah Bharat Ratna Hlan niin a ziak. (The New Leader : August 16 - 31, 2016, page 23) 4) Nobel Peace Price: Khawvela chawimawina sang ber nia ngaih hi Mother Teresa hnenah 1979-ah hlan a ni. Mother Teresa hi khawvelin heti khawpa a ngaihsan avangin September 5, 1997-a a thih pawh khan Calcutta-a a vuinaah khawvel ram 20 chuang hruaitute an tel a ni. MC-a thawk Sister-te hian Thutiam (Oath) pathum an nei a, chungtechu. 1. Thianghlimna 2. Thuawihna 3. Retheihna te a ni. MC-ah hian Mizo nula (Sister) 30 zet an thawk ve mek a. He pawla thawk Kulikawn nula chu hman deuh khan chawlh hmangin a lo hawng a. A chhungten pheikhawk (Chapal) an lo leisak a, a Sari an lo nawhsak thu sawiin, “Pheikhawk hi kan bun lai chauh lo chu a dang kawl a thiang lo a. Kan Sari (Cotton) pawh hi nawh phal a ni lo. Ka chhungte ka lo hrilh lo a ni,” nui chungin a ti a. He pawla thawk bawk, Durtlang nula, Evalyn chu Paris-ah kum 10 a thawh hnuah ni 3 chawlh a rawn hmang a. Amah thlahna inkhawma a thusawinaah, “Tunah hian Russia ram hmar lam Siberia-ah ka thawk dawn a. Ka nu leh pate hi an dam laiin ka lo hawn leh hman ka ring lo. La Isua kohna ka chhang tawh a, thiin emaw damin emaw, a tawp thlengin a hnung ka zui dawn a ni,” tiin hlim hmelpu takin a sawi a. Evalyn hian February 22, 2008 khan lehkha min rawn thawn a. A thawhna khua chu a vawt hle a, January thlaah chuan Temperature hi minus 35 degree celcius te niin a sawi a. Russia palian pui pui, pianphunga rualbanlote an enkawl a. Zun leh ek thiar nachang pawh an hrelova, an duh duh naah an zam zêk zûk mai thin a. Kutkawr hman phal a nih loh avangin kutlawnga patling zun leh ek han ruh hi a tirah chuan harsa a tih thu a sawi a. “Mahse, heng mi khawngaihthlakte zun leh ekah hian Lalpan Isua hmel min hmuhtir a. Ka Lallukhum timawitu tur a ni tih hriain ka hai bawrh bawrh thei ta a ni,” a ti a. December 1983 khan Pu R.Zoliana, MLA (L) leh Pu Lalhlira, MLA (L) te nen Mother Teresa hi Calcutta Airport-ah kan hmu a. Kawrlum phiar hlui tawh tak, a kiu te tet, thawmthat tawh hi a ha a. Vawthlep pheikhawk hlui tawh tak a bun a. MC Sister dangten an bah ang bawk Cotton Sari var, a sir a pawla tial a bat a.Canvas (Puanchhah) bag a khai a. Han en mai chuan Calcutta kawtthlera mirethei chenna (Colony) a awm ve niawm tak a ni. Atukah chuan Sap chanchinbu zawng zawngin phek hmaah a thlalak nen Delhia a Programme te an chhuah chuai chuai a. Pu R. Zoliana chuan, “Kan va han pawimawh hleih deuh ve le!” a ti a. Inti MLA ve em em, Mizoram sawrkar tirha Prime Minister hmu tur kalte hi Mother Teresa bulah chuan kan te chem chem a ni ber mai.