ZALEN May 20, 2026: Vawiin khan DC Office Chamber, Kolasib-ah Mother's Day pualin District Hub for Empowerment of Women (DHEW), Women & Child Development (WCD) buatsaihin nu chhuanawm te chawimawina hun hman a ni. 

He hun hi Lalnunpari Hmar, District Programme Officer i/c, WCD chuan a kaihruai a, Kolasib Deputy Commissioner H. Dolianbuaia chuan thusawina hun hmangin, tunlai khawvela fa enkawl seilen a hautak zia leh harsat ziate a sawi a. Society-ah sualna tam tak a hluar mek a, chumi kara nu in fa hlawhtling tak a chher chhuak thei chu thil namai lo tak a ni a ti a. Hmeichhe tha leh tha lo tehfung hrang hrangte sawiin, chawimawina dawngtu nute chu hmeichhe tha leh entawn tlak an nih thu sawiin duhsakna a hlan.

He chawimawina thilpek hi Kolasib district chhunga hmeichhia, pasal te tel lova fa hlawhtling tak tak enkawl seiliantu nu (single mothers) te hnenah pek a ni a. 

Chawimawina dawngtu te chu:

1. Nuzawni

2. K. Zosangliani

3. H. Lalsangpuii

Chawimawina hun hmanah hian MHIP Kolasib Sub-Headquarters hruaitute leh chawimawina dawngtu chhungte an tel a. He hun hi Elizabeth Lalmuankimi, District Mission Coordinator, DHEW chuan lawmthu sawiin a khar a ni.