DOWNLOAD OUR APP

Read latest news on your phone
play-store app-store
app-store
Motor intlanchhawkah Officer Buai Ve Lo
titi ZALEN
Jul 07, 2019
ad
  • R.Zomawia, I.T.I
  • Khawpui chhunga kawngpuite hi mihring kalna nen a chep em em a, mihring kal bikna hmun awm tha lo tam tak khawpui chhungah hian hmuh tur a awm a ni. Kawngpui chep tak leh mihring inkal tawmna hmun hi a tam hle, motor a tawt tawh si a, thuneitute lu a hai a ni. Khawpui kawng traffic tihziaawmna turin motor zawng zawng number awmze neia bithliah siamin intlanchhawktir a ni. Hetah hian lirthei a tlem phah em tih erawh ngun taka kan ngaihtuah a ngai a, motor nei ve tawk tawk tan chuan a din nia din mai kha a ni mai a, mi hausa awm thei deuhte chuan harsatna a awm lem lo niin a lang. Number din hun loha number dang lirthei an lei leh mai a, tun dinhmun han en hi chuan traffic jam tak tak hi a la ziaawm meuh lo niin a lang. A thenah chuan a ziaawmna laite chu a awm ngei ang. Hetiang a nih chhoh zel chuan sawrkar tan pawh thil dang ngaihtuah zel a ngaih hmel a ni. Lirthei hi a la pung chho telh telh dawn a, garrage nei lo chu pek loh tur han ti ngial thin mah ila, dan zawm tha duh lo, thawktute atang pawha lo ‘comment’ avanga garrage nei lo, motor nei thei tho si hi tam tak an awm niin a lang.
  1. Motor dahna tur mumal nei lovin engtin nge motor an neih theih thin? - He zawhna hi engvanga lo awm nge kan tih chuan garrage nei si lo, motor nei tam tak an awm vang a ni. Sawrkar harh tharna a la rei teh chiam lo va, harh thar han tih hian hman deuh kha chuan tun ang em ema garrage neih tur tih hi a awm lem lo va, khawpui lo tawt chho zelin a rawn hrin chhuah atangin sawrkar pawh a harh ta hawk a ni ti ila kan sawi sual lo mai thei. Khawpui lo thang lian chho zel tur te, motor neih duh chuan motor a neih theih a, garrage pawh a nei tel ngei tur a ni tih dan awm sa hi mipui hnenah hman atang khan hrilh hriat ni sela, tuna kan khawpui plan mumal lo tak, kan buaina hi eng emaw chen chu a thawl hawk thei ang. Miin lirthei a lei ve ngawt a, a dahna lam ngaihsak lo tam tak an awm a, kawngpui sir rem lai chuh a, ngaihtha veng veng hi mi tam tak kan ni. Phai ram angin kawtkaia motor kawng awm vek thei a ni lo va, tlangram chhengchhe tak mai angah hi chuan a tira khawpui plan hi a dik tur a ni. Khawpui plan dik si lo hi kan harsatna lai tak chu a ni. Kawngpui bula in nei thei lo, step kal ngaia in leh lo nei mi tam tak an awm a, hengho hian lirthei an duh ve si chuan garrage hi neih vek theih a ni lo tih hi a lang chiang em em a ni. Sawrkar lah dan angin motor nei chuan garrage a nei ngei tur a ni tiin thupekte han siam ngawt thin mah se, a tak takah chuan a hlawhtling mawh viau a ni. Hetianga lirthei dahna mi tam tak kan buai a nih chuan veng tin deuh thawah sawrkar hian hmun lei sela, garrage in lian pangngai tak sa sela, chutah chuan motor neiho chuan a luah duh ngei dawn a ni. Luah man sawrkarah a lut char char thei ang. Motor lei tur pawhin sawrkar garrage hmun kha a awl a nih chuan application form-ah khan a ziak mai tawh ang. Tunah chuan dahna tur nei si lo pawn tute garrage emaw an kawk a, chu chu thawktute lam pawhin an lo ring ve mai thin ni awm tak a ni a, motor leituin dawt a sawi a, dawt an sawi miau chuan thawktute lam tan chuan tihngaihna a awm lo mai thei. A hmunah pawh va en sela garrage ruah lai tak kha a lo ni dawn si a, heng vang te hian dan anga motor nei tura ngaih a nih laiin dawt sawi avanga garrage nei si lo motor nei kan awm teuh thin tihna a ni. Dawt sawi hi kan hreh lo thin em atin ni.
  2. Traffic jam chhan thenkhatte: Aizawl khawpui heti khawp hian a tawt a, thuneitute pawh an buai, sawrkar thuneihna chang tura hmalate pawhin an thiltih tur zinga pawimawhah hmun lailai a chang ta rup rup mai, Aizawl khawpui traffic tihziaawm leh garrage sak tih te, khawpui chunga motor kalna tur leilawn a ri ta nawk nawk mai, India ram khawpui tam zawkah chuan over bridge (leilawn sang) hi a awm thluah hlawm tawh a, khawpui a tawt a, ngaihtuahna tha tak tak sawrkar pawhin a neih belh zel tihna a ni. Aizawl khawpui hi han thlir vang vang ila, traffic jam a awm mup mup reng mai, a hnung taka dingte tan chuan eng ber nge traffic jam chhan tih hriat a har thin. Hmun thenkhatah chuan kawngsira motor lo dah tlat vang te, kawngpui sira in sakna hmanrua balu, rawra, rod, brick lo inchhek hnur te hmuh tur a awm thin hi a pawi hle a ni. Thenkhatte phei chu rei tak tak dahte an ni hlawm, hengho hi an inthlahrung lo hle a ni, mipui kawng an zah lo nge tih lah hriat a ni lo, local council, AMC hriatpuina leh dah phalna an lo nei a nih pawhin mipui tan a hnawksak hrim hrim a, traffic a tih-jam phah a, kea kalte tan pawn a hnawk viau a ni. Mit a kham duh hle bawk, kawngsira dah hi phal loh hrim hrim tur a ni. Lehlam lehlama kawnga motor tlan reng a ni a, an dah hnawkna lama kalte tan chuan intlanchhawk a ngai thin a ni. Heng hian traffic jam nasa takin a siam thin, chhuna kawngpui sira motor lo park tlatte hian a tihnawksak bawk a, kawngpui lun lai tak sira workshop lo awm tlatte hi a hnawksak a, thuneitute hian an hre reng tho mai thei, tih vak ngaihna an hre lo zawk nge ni tih hi zawhna awm reng a ni. Officer lian motor hi hnawksak hmuh tur a awm zeuh zeuh, traffic police pawhin an tihtha ngam vak loh ni hmiang, hetiang motor luhlulho lai taka an dahnaah hian an ngam zawng chu nise, hauh emaw chawitir emaw a ni leh tho tho ang. Dan hman a rual lo va, dan kan ngai pawimawh tawk lo hi traffic jam tamna chhan a ni.
  3. Motor intlanchhawkah officer buai ve lo: Ni rawn inher chhuah apianga a tawpa motor number ang zelin indin chhawk sawrkarin a kalpui a, traffic jam chu a ziaawm phah deuh mai thei; mahse, heti chung hian traffic jam chu nasa tak a la ni reng tho. A bik takin sawrkara motor kawl theiho, motor kawl theiah pawh a chungchuanghote hian motor indin chhawk hi an tan a hnawk pha lem lo niin a lang. A chhan chu an motor a din ni khan office motor dang an hmang leh tho tho thin a, engmah an tan buaina a awm lo niin a lang. Intlanchhawka mahni motor kawl lai a lo inher chhuak a nih chuan private motor-in emaw, taxi-in emaw office hi kal ve ta mai se chuan nasa takin traffic jam hi a tiziaawm ngei ang. Motor kawl phaho rualin an motor a number din ni a lo thlen a, office motor dang an hman leh tho si chuan he dan hmangtu, zawmtu tur bera ngaihten dan chu zawm inti tho siin traffic jam tihziaawm sawrkar tum tak kha an tihlawhtling lo tihna a ni. Minister te, Chief Secretary leh Secretary rual te, department head te leh a danghote hian an motor din ni khan simple takin ni khat na na na chu kal ve mai se a va tha dawn em!! Taxi hmang sela, taxi-a inhlawhte tan hlawk bawk a lo ni ang a, sawrkar policy tak tak pawh an tihlawhtling tihna a ni dawn a ni. Tuna kan kalphung, intlanchhawkah hi chuan heng kan sawiho tan hi chuan engmah harsatna a awm lo a ni.
  4. Dan hi mi tinin ngai pawimawh ila: Dan hman hrehawm tak, mipui tana hnawksak hi chu a tam teh chiam lo, mipui tana thatna tur leh ram himna tur a lo ni tlangpui thin. Zu khapna dan kan ti a, motor intlanchhawk sawrkarin an siam a, tun anga motor a la pun zel chuan tun aia khirh nia langte pawh hi sawrkarin a la rawn siam zel dawn a ni. Hei hi mipuite zalenna inrah behna ngawt a ni vek bik lo va, kan himna tur, kan that tlanna zawk tur a lo ni fo thin. Hnawksak zawk fo thin chu dan palzut tum tlat hi mipui lam atang te, hotu lian atangte hian a awm thin a, hei hi kan buaina tam tak a ni zawk. Kawng lun lai em em, a sira hnawksak tawk chiahin police hotu motor lo ding vang mai te, sawrkar hotu lian motor laklawh taka lo ding vang mai te, mipui vantlang chung lama hawi pir intite luhlul chhuah an awm bawk thin a, hengho hian traffic police duty-te hi chu an ngam phian a, an driver chen hian an hawi pir emaw tih tur a ni. Hetiangho hian dan hi an timawi lo va, an tihmingchhe zawk fo thin a ni. Chuvangin, motor intlanchhawkah pawh hian mahni motor din niah chuan motor dang office-a mi beisei lo sela, a theih ang angin mahni motor nei chuan kal se la, nei lo chuan taxi-te pawh hmang ve dawr dawr zawk rawh se. Chu chu miin an ngaisang zawk ang.

Latest News & Chhiar Hlawh