Aizawl March 20, 2023: Aizawl District Bawrhsap Dr Lalhriatzuali Ralte chuan lirtheia chuang te himna tura siam, Motor Seat Belt te tha taka hman a nih theih nan, a hnuaia tarlan ang hian Seat Belt Alarm hmeh mih theina hmanraw siam chhuah te zawrh leh hman a khap.

Department of Consumer Affairs, Ministry of Consumer Affairs, Food and Public Distribution, Govt. of India-in a sawi ang leh Rule 182A(3) Motor Vehicle Amendment Act, 2019-in a sawi angin mihring himna tura duan te tiderthawng thei thil zawrh khap tlat a ni, DC thuchhuak chuan a ti. Motor part zuartu ten he dan kalh hian seat belt stopper clip an zuar thin niin hriat a ni a ti a, mihring himna tiderthawng thei a nih avangin, zawrh khap a ni.

DC chuan, "Tunlai motor-ah chuan seat belt alarm dah vek a ni tawh a, mi tam takin hei hi duh lovin, an motor-ah seat belt alarm stopper clip an vuah thin a. Hei hi Rule 124 & 125 of Central Motor Vehicle Rules, 1989 bawhchhiatna a ni," a ti bawk. Car seat belt alarm stopper clip zawrh leh lei hi khap a ni tih mipuite a inhriattir a ni.