ZALEN December 4, 2025 : Food4Thought Foundation leh Monocept ten an buatsaih India ram pum pui School zirlai naupang te pual quiz competition Reading Decathlon Final January 17, 2026 a neih turah Mizoram atangin Mount Carmel School, Chaltlang leh La Montessori School, Mission Veng te chu thlan an ni.

First Round hi August 22, 2025–ah MYC hmalaknain Online mode hmangin MYC conference room-ah buatsaih a ni a. Hetah hian School pali(4) an tel a. He round-ah hian North East aiawh tur thlan an ni a. North East aiawh tur hian Mount Carmel School leh La Montessori te hi thlan an ni ta a ni. November 29, 2025 Indore, Madhya Pradesh a neih Regional Round chu paltlang leh in tunah hian January 17, 2026 a National Round (Final) intihsiakna hmachhawn turin Mount Carmel School leh La Montessori School te hi an inbuatsaih mek a ni.

Regional Round Indore,Madhya Pradesh kalna senso hi MYC chuan sum leh pai a tumsak bakah MYC office-ah MYC Chairman Malsawmzuala Ralte chuan briefing a neihpui a, fuihna thute a sawi a ni. Hetiang inelna lian tham India ram pum huap Quiz competition a final round thleng thei school an nei hi MYC chuan an lawm thu leh an chhuan thu an sawi.