Aizawl: Mizoram Journalists Association (MJA) chuan Assam police ten Mizoram chanchinbumite chunga kut an thlak chungchang a tul anga Mizoram MP pahnih Ronald Sapa Tlau leh CL Ruala ten an buaipui avangin lawmthu an sawi. Mizoram journalist 8-ten Assam Police-te kut an tawrhna kha MJA chuan a theihna apiangah a tul chen chen kal inhuamin hma a la nghal kha a ni a. Mizoram Journalist 8-ten Assam Police-te kut an tawrh dan hi thlalak nen kimchanga taka tarlangin Prime Minister of India, Union Home Minister, Union Minister for Information & Broadcasting, Union Minister for DoNER, Chief Minister of Assam, National Human Rights Commission, National Commission for Women, Press Council of India-ah te a thlen a. Heng lehkha pawimawh tak takte a tul anga lo buaipuisak tura MJA ngenna tihlawhtlingin Rajya Sabha MP Ronald Sapa Tlau chuan heng MJA zualkona lehkha pawimawh zawng zawng hi a dawngtu turte hnenah, hun leh tha tam tak sengin amah ngei kalin a pe vek a, tawngkamin a tuihnih nghal vek bawk a. MP inpekna leh thlawmngaihna hi MJA chuan lawmawm a tiin, a ngaisang tak zet a ni. MP Ronald Sapa Tlau hmalakna hian rah a rawn chhuah tan nghal a, National Human Rights Commission chuan na takin awka a rawn chhuah tawh a,  Assam leh Mizoram Director General of Police te chu kar li chhunga thil thlen dan report thehlut turin a ti a, rah chhuah dang pawh MJA chuan hmuh chhoh zel beisei a ni. Hei bakah Lok Sabha MP CL Ruala chuan Mizoram Journalist-ten Assam Police-te kut an tawrh chungchang hi Supreme Court Advocate lar tak Dr. Anish Agarwal chu lo sawipuiin, Dr. Anish Agarwal hian Assam Police kut tuar Mizoram Journalist-ten zangnadawmna an hmuh ngei theih nan a tulna apiangah theihtawp chhuahpui a inhuam thu MJA pawh a rawn hrilh a, MJA chuan thlamuanthlak a tiin, Lok Sabha MP chungah pawh lawmthu a sawi a ni.