Aizawl : Vawiin April 12, 2024 khan Congress Party chuan Congress Bhavan-ah ‘Friday Political Session’ an hmang a. He hun thu sawitu Lok Sabha MP hlui Ronald Sapa Tlau chuan, “ZPM MP Candidate Richard Lalhmangaiha’n Central atangin sum crore tam tak ama sawichhuah liau liau anga mipui hmaa a sawi duh kha a ti ang lo hle in ka hria” a ti.

Congress Chief Spokesman chuan, “ZPM hian issue based-in kan kal dawn an ti a, BJP agenda zawng zawng hriat hnua neutral nih la tum hi hriatthiam a har. Chungleng leh hnuai leng indo laia bak ang kha an nih chuan a tha lo hle. ZPM MP Candidate Pu Richard Lalhmangaiha’n Central atangin sum crore tam tak ama sawichhuah liau liau anga mipui hmaa a sawi duh hi a ti ang lo hle. Hemi chungchangah hian Press Conference ko rawh ti ka tawng nual a, kum 2018 khan Pu Richie-a leh Pu Tlana te hi ka chenna in New Delhi-ah an rawn kal a, sawrkarin MLTP Act. a siam hnuah Wine hralh a tla lo a, grape chingtuten minimum support price an beisei thu an rawn sawi a, a tukah Agriculture Secretary ka hmuhpui ta a ni," a ti.

“He thil hi crore tel a nih avangin a inchiah rei ang reng hle a, a khat tawkin ka va ngaihven reng a. Kum 2019-ah khan Inthlan laia Hnahlan khua ka kalin mipui hmaa thu ka sawi laiin ka phone a rawn ri a, Agriculture Secretary-in min rawn bia a, tunah hian grape chingtute sum cheng vaibelchhe 3.5 a lakchhuah theih tawh tih thu a rawn sawi a, keiin mantang ei tur an awm leh awm loh ka zawt a, ani chuan cut then a awm a nih chuan ka pocket atangin ka hnawhkhat ang a ti a, loud speaker-a dah ka nih avangin a sawi zawh rualin ka bula mite’n kut an beng dur dur a ni," a ti.

Sapa chuan, "Tun hnuah hian vaibelchhe 3.75 a lang a, society-te sawi danin Pu Richie-a leh Pu Tlana hnenah hian 2.42 a lut tih thu te, 35% a inpe tih thute ka hria a. Anni hi vawi khat ka hruai a, vawi tam tak ka bawhzui a, Pu Hawla DO lehkha kha a pawimawh ber chu a ni, kei chuan ka sawichhuah tiin ka sawi ngai lem lo.” a ti bawk.