Aizawl May 14, 2023 : Mizoram Lok Sabha MP C.Lalrosanga chuan Manipur-a Zohnahthlak tribal hnam hrang hrangte tana India danpui huam chhunga inrelbawlna hrang ngiatna a thlawp tlat thu a sawi.

Manipur-a Zohnahthlak MLA-te inrelbawlna hrang ngiata press statement an siam chu thlawpin MP C.Lalrosanga chuan Manipur MLA-te leh tlangmi pawl hrang hrangten inrelbawlna hrang an ngiat hi âwm a tih thu leh Manipur-a tlang mite duh dan ang a nih a rin thu a tar lang a. “Tun hnaia tharum thawhna chhuak, a bikin tlang mite laka tharum thawhna chhuakte thlirin inrelbawlna hrang hi Manipur-a tlang mite mamawh tak a ni,” a ti. 

MP Rosanga hian Zirtawpni khan Manipur tlangmi MP (LS) Dr. Lorho leh Saikot MLA P.Haokip te biain an duh dan hi a thlawp thu a hrilh a. MLA Haokip te nen hian Rosanga chuan Aizawla ama inah Nilaini kalta khan Manipur-a inrelbawlna hrang tlang mite tana ngiat chungchang hi an lo sawi tawh a ni. MLA Haokip hian tun kar chhung hian Chief Minister Zoramthanga hmuin Manipur-a thil awm dan leh tlang mite awm dan tur chungchanga hmalak dan sawipui an tum a ni.