Aizawl: Nimin khan Mizoram Pollution Control Board huaihawtin kumina World Environment Day lawmna hmasa atan Govt. Aizawl College-ah Plastic Pollution tih thupui hmangin On The Spot Painting Competition buatsaih a ni. He Competition hi Aizawl khawpui chhûnga sikul hrang hranga Eco- Club member te tâna buatsaih a ni a, sikul 22 atangin zirlai 88 an tel thei. Competition hi Category 2-ah then a ni a, Category I-ah Primary School leh Middle School-te an awm a, zirlai 27 an tel thei a. Category II-ah High School leh Higher Secondary School-te an awm thung a, zirlai 61 an tel thei bawk. Lâwmman hi Category I-ah 1-na Rs. 3000, 2-na Rs. 2000 leh 3-na Rs. 1000 a ni a, Category II-ah 1 na Rs. 5000, 2 na Rs. 3000 leh 3 na Rs. 2000 a ni a, lâwmmante hi June 5 (Thawhlehni)-a, World Environment Day  hman hunah sem a ni ang. Painting Competition bâkah hian Crafting Competition pawh Mizoram chhûnga Eco Club member-te tân buatsaih mêk a ni a, zirlaiten plastic hman hlui atanga an thil siamte chu Mizoram Pollution Control Board office-ah May 30, 2018 thleng an theh lût dâwn a, lâwmmanah 1-na Rs. 3000, 2-na Rs. 2000 leh 3-na Rs. 1000 niin June ni 5 (Thawhlehni)-a World Environment Day  hman hunah sem tur a ni. Kumina World Environment Day thupui hi ‘Beat Plastic Pollution’ tih a ni a, nimin thleng khan plastic bawlhhlawhte hi tihriral dân tha a la awm loh avângin Mizoram Pollution Control Board chuan a tlêm thei ang ber plastic lam chi hmang turin mipuite min duh a ni.