Aizawl;  Mizoram Pollution Control Board chuan a tih thin dân angin kum 2016 December ni 31 leh kumthar 2017 January ni 1 lai vêla boruak dinhmun chu Aizawl, Lêngpui, Lunglei, Champhai leh Kolasib-ah te ngun takin a zirchiang a, bawlhhlawh nâwi hip luh tham leka tê (PM10) te, Sulphur dioxide (SO2) leh Nitrogen dioxide (NO2) te teh an ni a, Aizawl khaw chhûngah hian boruak chhe tehna khâwl hi Bawngkawn, Laipuitlang, Dawrpui leh Khatlâah te dah a ni. Khawpui dangah chuan hmun hnih zêlah a tehna khâwl hi bun a ni thung. Aizawl Station hrang hranga mi khaikhâwma dinhmun chu, hetiangin - Sulphur dioxide (SO2) chu nikum leh kuminah teh tham loha hniam (Below Detection Limit) a ni a, PM10 (hip luh tham leka tê bawlhhlawh lêng vêl) hi nikumah microgram per cubic metre 112 a nih laiin kuminah erawh him chin bituk zât 60 (National Standard) hnuaiah niin microgram per cubic metre 49 a ni. Boruaka bawlhhlawh nâwi lêng vêl tlâk hniamna chhan nia lang chu nikum (2016) thlasik a nat vak loh avângin romei ang deuh chhûm zâm chuai- smog {bawlhhlawh nâwi leh hnâwng (fog) inpawlh} a awm vak loh vâng niin a lang. Nitrogen dioxide (NO2) hi chawhrualin nikumah microgram per cubic metre 12.6 a nih laiin kuminah chuan microgram per cubic metre 9.02-ah a tlahniam. Amaherawhchu, zan dar 10 leh zing dar 6 (Hâlpuah hâl hun lai) inkârah erawh chuan Khatla, Bawngkawn leh Dawrpuiah a pung nasa hle a. Khatlâah chuan microgram per cubic metre 15 niin nikum aiin 114.20% laiin a pung a, Bawngkawnah chuan microgram per cubic metre 13 niin, 44.44% in a pung a, Dawrpuiah chuan microgram per cubic metre 17 niin 54.54% in a pung bawk. Lengpui, Lunglei, Champhai leh Kolasib-ahte hian nikum nen danglamna a awm lutuk lo a ni. Bawngkawn-ah ri rin dân (Ambient Noise level) teh a ni bawk a, zan dar 10 leh zanlai dar 12 inkâra ri bengchhen zâwng hian Noise Standard decibel 55 (Phal chin) pêlin zan dar 10 leh 11 inkârah decibel 58.9 a ni a, zan dar 11 leh 12 inkârah phei chuan decibel 61.4 a kai bawk a ni.