Aizawl: Mizoram Pollution Control Board chuan a tih thin dân angin kum 2015 December ni 31 leh kumthar 2016 January ni 1 lai vêla boruak dinhmun chu Aizawl, Lengpui, Lunglei, Champhai leh Kolasib-ah te ngun takin a zirchiang a, bawlhhlawh nâwi hip luh tham leka tê (PM10) te, Sulphur dioxide (SO2) leh Nitrogen dioxide (NO2) te teh an ni a, Aizawl khaw chhûngah hian boruak chhe tehna khâwl hi Bawngkawn, Laipuitlang, Dawrpui leh Khatla-ah te dah a ni. Aizawl khaw chhûng bikah ri bengchheng (Noise pollution) pawh teh a ni. Khawpui dangah hian hmun hnih zêlah a tehna khâwl hi bun a ni thung. Aizawl Station hrang hranga mi khaikhâwma Aizawl dinhmun chu hetiang hi a ni. Sulphur dioxide (SO2) chu nikum leh kuminah teh tham loha hniam (Below Detection Limit) a ni a, Nitrogen dioxide (NO2) hi nikumah 9.00 ?g/m3 a nih laiin kuminah chuan 13.75 ?g/m3 a ni a, PM10 (hip luh tham leka tê bawlhhlawh lêng vêl) hi nikumah 40 ?g/m3 a nih laiin kuminah him chin bituk zât 60 (National Standard) pêlin 112 ?g/m3 lai a tling a ni. Lengpui, Lunglei, Champhai leh Kolasib-ahte hian nikum aiin boruak bawlhhlawh a pung hret hlawm a, amaherawhchu hlauhawm khawpa pung a awm lo thung. Kum 2015 December ni 31 leh January ni 1 2016 inkâr chhûng khân Aizawl khawpui veng pali- Khatla, Dawrpui, Laipuitlang leh Bawngkawnahte ri rin dân (Ambient Noise level) teh a ni bawk a, ri bengchhen dân chawhrual chu nikum lamah 55 Leq. dB a nih laiin kuminah chuan 57.2 Leq.dB a ni a, nikumah a rin lai berin 70.56 dB a nih laiin kuminah chuan 78.5 dB (Khatla Station) lai a tling a ni. PM10 lo pung ta hluai hi ngaihthat lohna tham a tling a, hetiang bawlhhlawh hi hnâr hmulin a dan ve theih loh khawpa tê leh hip luh tawh chuan chuap kâr vêla tâng tlat thin a nih avângin chuap kaihhnawih natna chi hrang hrang a la thlen thei dâwn a ni. Hâlpuah hâl nasat vângah puh theih a ni ang.