Aizawl: Mizoram Pollution Control Board (MPCB) chuan Aizawl khawpui lunlai hmun remchang ah boruak bawlhhlawh leh bawlhhlawh loh enna khawl Continous Air Quality Monitoring Station, Rs. nuai 110 man chu bun thuai an tum. Zalen zawhna chhangin Mizoram Pollution Control Board Secretary Er. C.Lalduhawma chuan an khawl thar bun tur chu boruak dinhmun, a bawlhhlawh leh bawlhhlawh loh te, carbon dioxide, sulphur dioxide leh thildang te pechhuak nghal zel thei a ni tih a sawi a. Tuna boruak tehna atana an hman National Ambient Air Monitoring (NAMP) chu laboratory ah enfiah anih hnuah ni 2/3 hnuah chauh a result a hriattheih thin avangin tuna an khawl bun thar tur chu mipui ten an chhawr tangkai hle a beisei tih a sawi. Er. C.Lalduhawma chuan, "Continous Air Quality Monitoring Station ah hian tun dinhmuna boruak awmdan diktak a lan nghal zel dawn avangin mipuiin kan dinhmun dik tak an hre thei ang a. Boruak awmdan a zirin policy thlak ngai a awm leh awm loh thuah pawh ngaihdan a siam theih dawn a ni," a ti bawk. Continous Air Quality Monitoring Station leina senso 90% hi central in an tum dawn a ni. Continous Air Quality Monitoring Station bakah hian tuna boruak tehna MPCB?in an kalpui mek National Ambient Air Monitoring (NAMP) pawh tuna a awmsa 11 bakah a la awmlohna district pali Lawngtlai, Saiha, Serchhip leh Mamit district ah te 8 bun tum mek a ni a. Hei hi tih zawh anih hun chuan hmarchhak bialah Mizoram chu boruak tehna nei tha ber a ni dawn a ni.