Aizawl October 2, 2022 : Mizoram Pollution Control Board (MPCB) chuan lirthei khuin boruak chhia a pek chhuah zat tehna, Pollution Under Control Certificate test-na hmun chu tuna neih mek bak hawn belh ngai an ti lo a. Kum 10 kalta chhung khan PUCC test-na atang hian Rs. 34,69,000 an hloh niin an sawi.

ZALEN-in MPCB Member Secretary Er. C.Lalduhawma hnen atanga thu a dawn danin tuna Aizawl khawpui chhunga PUCC test-na hmun thum chu tun hnaiah test an tam avangin an buai deuh a; mahse, harsatna hi a ziaawm thuai an beisei tih a sawi a. MPCB Secretary chuan PUCC test-na chu hawn belh mai a buaithlak tih sawiin, “Test-na hmun thar hawng tur hian khawl manah nuai hnih vel a ngai a, hei mai bakah thawktu pahnihte hlawh bakah inluah man chawi a ngai a; chuvangin, tunah awmsa hi tawk rihah kan ngai a. Truck tan bik hian tuna kan test-na hmun hi pan a harsat avangin Rangvamualah test-na hmun siam erawh kan tum a. Hei bakah district lam leh Aizawl khawpuia kalkual turin mobile van neih te kan rilruk deuh a ni,” a ti. PUCC test-na hi Aizawl hmun thumah leh Lungleia hmun khatah te dah a ni.

Er. C.Lalduhawma chuan dan pangngai ang chuan tuna khawl neih sa hian mamawh a phuhru nia an hriat thu sawi bawkin, “Nikum chhung khan Mizoram pumah lirthei 8,587 test a ni a, ni tin centre 1 ah motor 10 zel test ang a ni a. Kumin April atanga August thleng khan lirthei 6,661 test niin ni tin 14 test ang a ni a. Lirthei 14 hi chu centre pakhatah darkar chanve test ang vel a ni a. Tun hnaiah tlemin kan buai deuh a; mahse, a ziaawm leh mai dawn avangin kan khawl neih sa hi tawk hrihah kan ngai a ni,” a ti. 

Tun hnaia test an tam chhan chu sawrkar laipuiin dan thar a siam vang nia a hriat thu sawiin tunah chuan test zualpui chu an zo tawh a, test tura intlar pawh an awm tlem tawh nia sawiin thla thum vel an enthla ang a, chumi hnuah chuan thil awm dan azirin centre chu la hawn belh an tum chauh niin ZALEN a hrilh bawk.