Aizawl: Mizoram Pradesh Congress Committee Media Department chuan BJP hruaitu lawk Amit Shah programme a zirlaite tel tir tum chu thil inhmeh lo tak nia an hriat thu an sawi.

MPCC Media Department chuan thuchhuah siamin BJP hruaitu lawk leh Central Home Minister ni bawk, Amit Shah a programme-ah Aizawl khawpui chhung College zirlaite leh Mizoram University zirlaite tel tura MNF sorkarin thuchhuah khauh tak a siam chu Congress party chuan hriatthiam harsa a ti hle tih an sawi a. College zirlaite leh University zirlaite hi zalenna ngai hlutu, dan hnuaiah zalen taka duh duh sawi theihna (freedom of speech and expression) chawisang duhtu an nih avangin India ram democracy lungphum sawi thiat mektu BJP pachal Amit Shah programme a tel tura thupek an ni hi thil inhmeh lo takah Congress party chuan a ngai a ni, an ti bawk.

Congress party chuan, MNF sawrkarin thahnemngai taka Amit Shah a Programme a zirlaite tel tura thuchhuah a siam hi Central BJP leh MNF inmawngzawm nghehzia tilangtu a ni, an ti. Mizoram-ah MNF leh BJP te hi inhaw awm em emin lang thin mah se, lang lo lam, Mizo mipuite hmuh phak lohah thuk takin an thawk dun tih a lang chiang hle. Lemchan bansan tur leh BJP pachal hma ngeia Kristiante thlavang hauh ngam turin MNF sawrkar chu an ngen.