October 19, 2023; Mizoram Pradesh Congress Committee (MPCC) chuan Central YMA vice president hnena ngaihdam dilna leh mipui hnena thudik hriattirna leh ngenna an ti chhuak.

MPCC in vawiin a thuchhuah an siam a tarlan a nih danin, Tunhnaiah social media hrang hrang ah Central YMA vice president chanchin diklo takin a lo lang nawlh mai a, Assamese thlah ni ang a ziakin a pa pawh Dulal Sharma tiin an ziak nghe nghe a ni. Hei hi thu diklo, dawt hulhual a ni.

He thu diklo irhchhuah dan leh a darh dan ngun taka chhui a nih hnuah, congress party a hruaitu pakhat, a thudawnna diklo atanga lo darh a ni tih finfiah a ni a, he thu diklo darh avanga Pu Lalhmachhuana leh an chhungkua zawng zawngte mai bakah, a awmna Chaltlang Lily Veng Branch YMA, NGO hrang hrang leh ama pian leh murna hrechiangtute rilru nasa taka hliamte chungah MPCC chuan thupha chawiin ngaihdam a dil takzet a ni.

Pu Lalhmachhuana hi a pa chu Pu Chawngṭhuama (L) niin, a nu hi Pi Remsiami a ni a, an fa naupang ber niin, Chaltlang a piang a seilian a ni a, a pu (a pa hringtu) Pu Kaiphunga, Chaltlang mihlun a ni. Unau pianpui mipa pakhat leh hmeichhia 2 a nei bawk. Khawtlang leh kohhran tana theihtawp a thawk thin a ni.

MPCC chuan, "Lalhmachhuana chanchin dik lo, social media, a bikin facebook leh whatsapp a nasa taka darh hi a lo hmu te pawhin thudik lo a ni tih hria in, lo la kawl te pawhin khawngaih taka delete a, a dik zawk min puanzar pui turin kan ngenin kan sawm che u a ni" tiin an tarlang bawk.