Aizawl: Mizoram Pradesh Congress Committee chuan New Delhi a cham mek School Education Minister H. Rohluna leh Par.Secretary Joseph Lalhimpuia ten SSA sum Rs. nuai 7228 an nawr chhuak chu lawmawm an tih thu an sawi. Nimina thuchhuah an siamah MPCC chuan January ni 10,2017 a Parliamentary Secretary in a pisa thuthar lakhawmtute a kawmnaah, “Sawrkar hotuten Central-ah sanction release tura nawr rengin, tunah hian Rs. 71 crore hmuh mai kan beisei mek a ni,” tiin a lo sawi tawh a. Hei vang hian MPCC chuan Mizoram SSA sum cheng nuai 7228 lai mai Ministry of Human Resources Development atanga Minister leh Par. Secretary in an nawr chhuak hi Minister te thawhrim rah liau liau a ni, an ti a. SSA sum, state sawrkarin a lo do let ve tur, State Matching Share (SMS)-ah Mizoram sawrkar chuan harsatna a nei ngai lo nia sawiin SSA sum harsatna chu sawrkar laipui atanga sum release a muanchan thin vang zawk a ni, an ti.