ZALEN, 27th, December, 2025: India ram State hrang hrangah BJP thlunzawm VHP, Bajrang Dal leh RSS te'n Krismas lawmna tur cheimawi zawrh an suasam a, chei tawh sa tichhiain Krismas carol an rikrap nasa tih media-a lo lang chu Lal Thanzara, President, Mizoram Pradesh Congress Committee chuan pawi a tih bakah a ngai thutak hle tih thuchhuah siamin a tarlang.

'Kan ṭhenawm Assam State-a Nalbari District-ah pawh St. Mary School ten Krismas an lawmna tura an inbuatsaihna zawng zawng pawh suasam sak an ni a. Hetiang hian India ram State hrang hrangah Kristiante rikrap zawngin BJP Wing, RSS, Bajrang Dal leh VHP te hi na takin an che a. Krismas carol-a kal naupang thlengin an sawisak rawn bawk,' tiin an thuchhuahah ziah lan a ni a.

'India ram chu Secular State tiin chhuang taka sawi ṭhin a ni a. Nimahsela, BJP ten Sorkarna an chan aṭangin Kristiante tihduhna a kum telin a pung chho a, 2024-ah pawh khan India rama Kristiante tihduhna hi vawi 834 lai a thleng a. BJP Sorkar hnuaiah Secular State kan nihna hi a bo tial tial a, Kristiante nekchepna a nasa tulh tulh a ni', tiin thuchhuahah chuan tarlan a ni bawk. 

Mizoram Pradesh Congress Committee chuan India ram hmun hrang hranga RSS, Bajrang Dal leh VHP ten Kristiante chunga kutthlak a, an zalenna rahbehsak an ni hi a dem tak zet tih sawiin Kristian zinga kut tuar zawng zawngte a lainat tak zet tih an sawi bawk a.

He thil thleng avang hian Mizorama Political Party zawng zawngte pawhin he thila a mawhphurtu BJP te an thlawpna zawng zawng chhu chat vek turin Lal Thanzara chuan a ngen nghal bawk.