ZALEN October 17, 2023 : Ni 16.10.2023 zan khan Mizoram People Forum ( MPF) Gen. Hqrs hruaitute leh INC hruaitu Rahul Gandhi te chuan Central YMA Committee Room ah an inkawm a, Mizoram inthlan hrang hranga MPF hmalak dan leh kalphung te an sawiho.

MPF hruaitute hian Mizorama inthlanna thianghlim leh zalen a awm theihna tura an hmalak tawh dan leh MPF dinchhante an lo hrilh a. Political Party te nena thawhhona thuthlung an siam thin thu leh chu chuan inthlannaah awmzia a neih thin thu an sawi. Tun tum inthlan turah pawh Party ten zawm theih vek se an duh thu an sawi bawk. Rahul Gandhi hian MPF leh a hnathawh dan chu a lo hriat tawh thu leh MPF kalphung tha a tih thu te a sawi bawk.

Rahul Gandhi hian MPF hruaitute kawm a duh angin inkawmhona hi neih a ni a, MPF lam hi Rev Lalramliana Pachuau, Gen. Secretary in a hova hruaitu dang engemaw zat an tel. Rahul Gandhi hi MPCC President Lalsawta leh Party hruaitu dang ten an tawiawm bawk.