Aizawl: Mizoram Peoples Forum, Aizawl East II constituency chuan MPF leh political party ten inremna an siam chu an bawhchhia a, thuthlung bawhchhiat chungchang hi naktuk hian MPF chuan an sawiho dawn.   MPF Aizawl East II te hian MPF leh political party ten state level a nih loh chuan joint platform hi buatsaih/huaihawt loh ni se tia inremna an siam chu bawhchhiain Zirtawpni zan khan Dawrpui multipurpose hall-ah joint platform hi an huaihawt a, Doordarshan chuan live-in an pe chhuak a ni. Hetia inremna thuthlung MPF lamin an bawhchhia hi mi tam takin an sawisel nasa hle.   MPF General Secretary Rev. Dr. R.Lalbiakmawia chuan East II MPF ten inremna thuthlung bawhchhiaa joint platform an huaihawt chu pawi a tih thu Zalen a hrilh a. Hemi chungchang sawiho tur hian Thawhtanni ah MPF thuneitu sang, Board Executive Meeting an ko tih a sawi bawk.   Thudawnna dang leh chuan thu inhmuhfuh loh vang niin a sawi bawk.