ZALEN October 20, 2023 : Mizoram People Forum (MPF) chuan Political Party Thawhhonna Thuthlung chu MPF in a duh anga a duan political party-te a pawmtir a ni lo a. MPF leh political party hrang hrang hruaituten uluk taka an sawiho a, an ruahman hnuah hming an ziah hnan a ni, an ti. Thawhonna Thuthlung ang chuan Thuthlung thehdarh kawngah Party huang chhungah a zau thei ang bera puangzar turin Party te chu beisei a ni an ti bawk.

Vawiina chanchinthar lakhawmtute an kawmnaah MPF chuan Thawhhona Thuthlung hi political party aiawhte nen tum engemaw zat sawiho hnuah siam a ni, an ti a, political party President theuh ten an hming an ziah hnan a ni bawk. Heti chunga zah lo taka bawhchhia te chu mipui zahlohnaah an ngaih thu an sawi bawk.

Thawhhona Thuthlung chungchangah leh Inthlanna thianghlim leh muanawm kan neih theihna turin hetiang hian thuchhuah kan siam :

MPF chuan political party te nen February 28,2023 ah Thawhhona Thuthlung ziah a ni a. Hemi ni atang hian Thuthlung hi hman tan a ni a, amaherawhchu Thuthlung No.2 (2) House to House campaign phalloh chungchang erawh chu Election Commission of India (ECI) in Inthlan hun a puan ni October 9,2023 atanga hman tan a ni thung, an ti.

Hemi chungchangah hian District Forum, Constituency Forum leh Local Forum te chu House to House Campaign kal pui a nih lohna tura mahni huamchhungah thahnemngai taka hma la turin ngen a ni an ti a, political party te pawhin House to house Campaign hi kal pui tawh loh tur a ni bawk.

Thawhhona Thuthlung ang chuan Inthlan puan hnuah chuan political party ten Kawngzawh hi phal tawh loh a ni a. Amaherawhchu, tunhnaiah Mizoram hmun thenkhatah Thuthlung bawhchhia a kawngzawh thawm hriattur a awm chu pawi an ti a. Political Party ten an thuthlung hi zaha kawng zawh huaihawt tawh loh tur an ti.

ECI Model Code of Conduct leh Thawhhona Thuthlung No.2(3) in a phalloh angin mipui hnenah thil chi hrang hrang sem te hi tih loh tur a ni a, T. Shirt sem pawh ti tawh lo turin Candidate te an ngen a ni.

Thuthlung-in a sawi angin Inthlan puan hnuah political party ten Public Meetin/Street Campaign an buatsaih dawn chuan MPF kaihhruaina hnuaiah neih tur a ni a, chutiang ti turte chuan MPF te hriattir zel tur a ni.

Thawhhona Thuthlung bawhchhiatna a awm ni a hriat a nih chuan tute pawhin MPF ah Report / Complaint thehlut turin kan inngen a ni.