ZALEN August 4, 2026 : Mizo Zirlai Pawl (MZP) General Headquarters, Aizawl Emergency Executive Committee chu vawiin khan an thukhawm chuan, Mizoram Public Service Commission (MPSC) hnalak chungchanga Mizo thalai hna zawng mek ten a harsatna an tawh thin chungchang ngaihtuah a ni a, MPSC-a harsatna lo tawk tawh te chu naktuk hian MZP Pisa Pui-ah leng turin an sawm.

Meeting hi MZP President Dr C. Lalremruata’n a kaihruai a, Mizoram-a hna latu lian ber Mizoram Public Service Commission (MPSC) hnalak chungchangah thalaiten harsatna an tawh hrang hrangte an ngaihtuah a, tunhnaia an chetsualna hrang hrang avangin Mizoram thalai hna zawng mekte'n MPSC-ah rinna an nghah ngam loh phah mai dawn avangin, MZP chuan MPSC hi thuamchak anih theih nan leh a thawktu lak belh an nih theih nan hmalakna neih nise tiin an rel a.

One Time Registration (OTR) avanga buaina tawk leh MPSC hnalak avanga harsatna tawk zawng zawngte chu naktuk August ni 5, 2026 (Nilaini) chawhma dar 11-ah, MZP Pisa Pui, Treasury Square-ah leng turin an sawm a, hmalak chhunzawm dan tur sawiho nise an ti.

MZP chuan theihtawp chhuahin MPSC hnalak avanga buaina tawkte chu a ngaihven in a buaipui reng a, One Time Registration (OTR) avanga hna diltu thalai tam tak harsatna tawkte chungchchangah OTR avanga reject te, written exam fel vek tawh a hnua OTR fel loh avanga reject awm leh thin te chu pawi an ti a, MPSC fel fai leh tha zawk neih theih nan a hmalak dan tur sawiho leh ngaihtuahna turah hian kal vek turin an sawm a ni.