ZALEN December 12, 2024 : Vawiin khan MZP General Headquarters chuan tun hnaia Mizoram Public Service Commission (MPSC) hnuaia hna lak hrang hrang, social media a thil fello awm anga sawi awmte chu a ngaihtuah a. MZP-in a chhui zuina leh thalai hna zawng mekte atanga a thu dawn hrang hrangte thlirin MZP chuan thil fello a awm ngeiin a hria a. MPSC zahawmna humhim zel a nih theih nan, heng thil diklo awmte chhuichianga a tul anga hmala turin sawrkar a ngen.

MZP chuan, "MPSC-in Health & Family Welfare Department a thawk tur, Entomologist post khat ruak hnawhkhat tura an hnalakah hian, exam hmachhawn turin mi 22 an tling a. Exam petute atangin mi 5 te chu an Document endik tura thehlut turin hriattir an ni a. Thla 6 ral hnuah mi 3-te chu personal interview nei tura hriattir an ni,".

"Interview nei tura inbuatsaihna a kal mek laiin, Interview hun sawn (postpone) thut a ni a. Hna diltu zawng zawngte document ennawn turin Screening Board member pawh ruat thar a ni a. Interview tura a tira koh tel loh Lalfakzuala Pautu chu koh tel nawlh niin, final result-ah pawh Lalfakzuala Pautu chu lak a ni ta a ni," an ti.

MZP chuan Screening Board-in candidate-te uluk taka an document a zirchian hnuah, Interview tura koh tel ni lo Screening Board ruat thar hnuah koh leh hnuhnawh a ni a, he hnaah hian lak a ni ta ta hial a ni. He hna lak dan hi uluk taka zir chian a, chhui a nih hnuah duhsak zawngte thun tura ruahman a ni tih hai rual a ni lova. MZP chuan thalai hna zawng mekte ti hnual thei leh MPSC zahawmna ti chhe thei thil a nih avangin a ngai thutak hle a. Chung lam atangin thil tithei inrawlh an awm ngeia a hriat tlat avangin, chhui chian a phut a ni.

MZP chuan MPSC-in Entomologist hna a lak dan leh Veterinary Asst. Sergion hna a lak dan rinhlehawm tak hi chhui chiang a, a tul anga hma la tur Mizoram Sawrkar a ngen a. December ni 20 ral hmaa hmalakna a awm lo a nih chuan, hmalak zel dan tur a ngaihtuah dawn a ni.