ZALEN May 03, 2026 : Mizoram Public Service Commission (MPSC) chuan Thawhtanniah khan thuchhuah siamin Law & Judicial Department hnuaia Jr. Grade of Mizoram Legal Service (Legal Officer) post 2 ruak an lak tur chu a changtu department atanga hnuk let tura ngenna an dawn avangin advertisement lo tihchhuah tawh chu an sut thu an tarlang.

MPSC chuan Law & Judicial Department hnuaia Jr. Grade of Mizoram Legal Service (Legal Officer) post 2 ruak an lak tur thu January ni 7 ah khan hriattirna an tichhuak a ni.

May 5, 2026 ah khan MPSC-in hriattirna tichhuakin, hna diltu mi 115 zingah mi 112 te dilna chu hnawl an ni a, mi 3 te chiah dilna pawmsak an ni.

Legal Officer hna diltu thenkhatin ZALEN a hrilh danin dilna hi online veka thehluh tur a ni a, an dilna an hnawl chhan chu document an upload kim loh vang ni a hrilh an nih thu an sawi a. Mahse, online-ah hemi document bik upload-na tur an hmu lo niin an sawi.

Diltu zinga pakhat sawi danin an dilna an hnawl chhan chu document upload naah hian 'Others' tih chauh a awm avangin eng ber nge upload tur tih a awm lo a, midang pathum tling te hian BAR atanga 3 years advocate practice certificate an upload vang a nih a rin thu a sawi.